Melodia celebrando 15 aña lo tin concierto dedica na Maybeline Arends-Croes

Dia 26 di September venidero...

ORANJESTAD (AAN): Melodia un grupo musical bon conoci den e diferente temporadanan di aña cu su musica unico y gusta pa su repertorio bon varia unda cu nan presenta.

   E aña aki e agrupacion ta celebrando nan tercer lustro y lo ta preparando diferente proyectonan pa celebra esaki hunto cu su fanaticonan y pueblo en general.

   Melodia tin awor un fan-club hopi activo yudando pa haci cada un di e actividadnan aki exitoso, unda e promer lo ta un concierto cu lo bay tuma lugar diasabra 26 di September 2026 na “New China Club” den Caya Ritmo. Grupo Melodia ta preparando un show pa e anochi aki caminda lo complace cu tur presente cu nan repertorio bon varia y lo dedica e show aki na Juffrouw Maybeline Arends- Croes cu tin un lugar special den curazon di e agrupacion aki.

   Melodia durante su 15 añanan consecutivo presentando na diferente festivalnan, shownan, fiestanan familiar, pa organizacionnan, schoolnan y asina por sigui menshona, a cosecha hopi exito y ta hopi gusta pa esnan cu conoce e grupo aki.

   Pronto nan lo tin un cancion promocional cu lo ta saliendo pa asina prepara pa nan acostumbrado produccion riba USB pa e temporada di fin di aña.

   Pa e concierto na caminda ya tin carchi obtenibel cu por haya serka tur integrantenan y miembronan di e fan-club, y sigur tambe na Tat-Fat hardware cu ta nan sponsor principal. Busca bo carchi na tempo mirando cu e asientonan ta limita, forma bo grupo di famia, coleganan di trabao of amigonan y bin relaha y goza di un bunita show den “New China Club” cu grupo Melodia lo bay presenta.

   For di aki DIARIO kier a manda un palabra di pabien pa Melodia y tur su integrantenan cu e 15 aña

y tambe desea nan tur clase di exito pa e temporada cu nan proyectonan.  Apoyando nos talentonan local, ta engrandece nos cultura y nos musica, cu ta esnan cu ta trece cada vez cancionnan nobo pa deleita cada hogar riba e dushi isla aki.