Gobernador a señala cu Cuida Aruba ta mas cu tene e isla limpi

Riba apertura aña parlamentario nobo

• Ta cuida comunidad y futuro 

ORANJESTAD (AAN): Cu apertura oficial di Aña Parlamentario 2026–2027, Gobierno di Aruba a presenta su rumbo pa e periodo venidero, cu bienestar general, prosperidad comparti y responsabilidad comun como punto di salida. Den e vision aki, programa nacional Cuida Aruba ta ocupa un lugar importante, no solamente como un esfuerso pa tene y embeyece e isla, sino tambe pa fortalece participacion, convivencia y union den comunidad.

   E apertura di e aña parlamentario ta tuma luga den un momento historico, mientras Aruba ta celebra 40 aña di Status Aparte y 50 aña di Himno y Bandera. E ocasion ta invita pueblo pa honra loke e generacionnan anterior a construi, pero tambe pa wak dilanti y asumi responsabilidad pa e Aruba cu nos kier laga pa siguiente generacionnan.

   Pa Prome Minister Mike Eman, precisamente e sentido di responsabilidad comparti aki ta conecta directamente cu e filosofia tras di Cuida Aruba. Pasobra cuida Aruba ta mas cu cuida naturalesa; ta cuida comunidad, e calidad di bida y e futuro cu ta laga pa e generacionnan cu ta sigui.  
   Gobernador den su discurso a menciona cu “Gobierno a inicia cu partnernan semi-publico y priva un esfuerso nacional cu ta apela riba responsabilidad comun di henter comunidad; pa esaki a duna inicio na e programa nacional Cuida Aruba. Dos bes caba riba e ultimo Diasabra di luna Aruba a bin hunto pa responde na e yamada aki. Cuida Aruba ta un yamada cu ta bay mas profundo cu e empeño conhunto pa tene Aruba limpi, e ta un yamada pa comunidad di Aruba brasa di nobo e sentido di convivencia. Fortifica di nobo e liñanan invisibel di amistad, cooperacion y amor pa nos prohimo y Pais. Laga nos lanta tur dia y corda di nobo; cu Aruba ta nos.”

   Cuida Aruba ta un responsabilidad comparti: Gobierno a inicia Cuida Aruba hunto cu partnernan semi-publico y priva como un esfuerso nacional cu ta apela na responsabilidad di henter comunidad. Dos biaha caba, durante e ultimo diasabra di luna, comunidad a uni pa responde na e yamada y participa activamente den e esfuerso. Pero e vision tras di Cuida Aruba ta bay deliberadamente mas leu cu recoge desperdicio of limpia un espacio publico.

   E programa ta busca pa Aruba fortalece di nobo e conciencia cu cuido di pais ta un responsabilidad comparti. Gobierno, sector priva, e organizacionnan y ciudadano, cada un tin un papel den calidad di e comunidad caminda nan ta biba.Den e discurso di apertura di Aña Parlamentario, e filosofia di Cuida Aruba ta refleha den e yamada pa comunidad brasa di nobo e sentido di convivencia y fortalece e “liñanan invisibel” di amistad, cooperacion y amor pa prohimo y pais. Esey ta precisamente e dimension cu Gobierno kier sigui duna realce na e programa den e periodo venidero. Cuida Aruba ta cuida naturalesa, pero ta tambe cuida nos bario, nos calidad di bida, relacion entre hende y e futuro cu Aruba ta laga pa e generacionnan cu ta sigui.

    Cuida Aruba ta conecta cu varios otro prioridad cu Gobierno a presenta pa e aña parlamentario nobo. Recuperacion di ecosistemanan lo continua, banda di e programa nacional di reforestacion, cu e ambicion di planta 100.000 palo durante e actual periodo di gobernacion. Maneho mas responsable di desperdicio y participacion activo di comunidad ta forma parti di e mesun direccion.Na mes momento, Gobierno kier inverti den e ambiente caminda ciudadano ta biba diariamente.

   Cu aprobacion di e ley pa Fondo di Inversion, a  crea e base legal pa inversionnan publico importante. E intencion ta pa presenta na Parlamento inversionnan den, entre otro, mehoracion di bario, renobacion di scol y monumento, reforestacion, MFA na San Nicolas y embeyecimento di centronan di ciudad. Pa Gobierno, tur e esfuerzonan aki ta conecta cu otro. Un bario bon manteni, un espacio publico cu comunidad ta cuida y un centro urbano cu tin bida ta contribui directamente na calidad di bida.

   Progreso mester yega cerca ciudadano: E vision pa 2026–2027 ta inclui tambe un base economico y social fuerte. Gobierno lo mantene atencion pa poder di compra, siguridad social y oportunidad pa famianan progresa. Den e periodo anterior, medidanan manera aumento di pensioen y bijstand, eliminacion di prima AZV pa e pensionadonan y ampliacion di sosten social a forma parti di e esfuerzo pa laga progreso economico yega mas directamente cerca ciudadano. Vivienda pagabel, salud, educacion, infrastructura y siguridad tambe ta forma parti di e rumbo. E hilo conductor ta cu progreso no mester keda solamente den plan, cifra of documento. Ciudadano mester por mira y sinti e cambio den su propio cas, bario y comunidad.

   Cuida Aruba ta cuida loke ta di nos tur: Den e aña cu Aruba ta celebra 40 aña di Status Aparte, Prome Minister Eman ta pone enfasis riba e responsabilidad cu cada generacion tin pa entrega pais den un miho condicion na esnan cu ta sigui. Cuida Aruba ta encera precisamente e pensamento ey: no spera solamente riba Gobierno, sino reconoce cu cada sector, organizacion y ciudadano por contribui na bienestar di pais.

   E esfuerso pa un Aruba limpi y cuida ta importante, pero e ambicion ta mas grandi: fortalece e sentido cu Aruba ta di nos tur y cu futuro di Aruba tambe ta responsabilidad di nos tur. “Cuida Aruba ta mas cu cuida nos naturalesa; ta cuida nos comunidad, nos calidad di bida y e futuro cu nos ta laga pa e generacionnan cu ta sigui.”