Un centro mas grandi pa miho servicio
ORANJESTAD (AAN): Mary Joan Foundation ta muda bay Santa Cruz 154-A. Mary Joan Foundation (MJF) ta anuncia cu e ta muda bay un centro mas grandi na Santa Cruz 154-A. E centro nobo aki lo permiti e fundacion pa brinda su servicio mihor y bao di un solo dak, pa asina e clientenan por haya tur e sosten cu nan mester na un solo luga.
Un centro nobo bou di un solo dak, ta pone cu den futuro, e centro nobo aki lo tin: (*) Un propio espacio pa e psicologo. (*) Un propio espacio pa e chekeonan medico. (*) Un espacio pa e proyecto di peluca. (*) Un sala pa actividadnan pa clientenan. (*) Tambe e proyecto Workshop Factory.
Workshop Factory lo duna tayer nan riba diferente tema, pa asina MJF por genera mas fondo pa sostene su servicio.
E realidad financiero: No ta un secreto cu MJF ta ricibi solamente 5.000 Florin pa luna como subsidio for di gobierno di Aruba, mientras cu e gastonan ta conta riba 14.000 Florin pa luna. Ayudo psicologico no ta wordo cubri pa AZV, y e fundacion ta carga tur e gastonan aki for di su mes un fondonan.
MJF a yega su limite di fondo aña pasa pa duna e servicio aki. No obstante, den 2026 nan a sigui uza nan reservanan pa por sigui brinda servicio y pa haci e proyecto di checkeo den bario un exito.
E mentalidad holístico: MJF ta hiba e mentalidad holístico: bo curpa, bo mente y bo alma mester ta den balance. Mas liher esaki pasa, mas facil bo tratamento lo ta, y mas facil bo ta regresa den bo bida diario, sea bek na trabao of cu bo labornan di cas.
“Nos ta convenci cu sosten integral ta e clave: no solamente e tratamento, pero tambe e sosten pa mente i alma. E centro nobo aki ta un paso grandi pa duna e servicio aki bou di un solo dak, na esnan cu ta lucha contra cancer,” ta loke Jose Tromp, Director di Mary Joan Foundation a declara.
Un rifa di panel solar: Pa cubri tur e gastonan di e aña aki, un biaha mas ta pidi comunidad y gremio comercial pa apoya nan cu e proyecto aki, cumprando un di e rifa di un sistema solar panels off-grid di 10 kW.
E ticket ta costa 100 Florin y sorteo lo ta live via Facebook dia 31 di October 2026, den presencia di un notario. Ticket ta obtenibel via WhatsApp na 594-0919 of via email na: This email address is being protected from spambots. You need JavaScript enabled to view it..
Con por yuda: Casonan di cancer a sigui crece, y na Aruba no ta un excepcion. Pesey ban uni pa asina nos por adelanta e problematica di cancer. Duna un man cumprando un rifa, of aporta na un di nos buzonnan den establecimento nan, of durante e colect tur fin di siman den luna di October.
Na nomber di henter e directiva, e personal y e clientenan: Un danki di curason pa tur apoyo ricibi.
