Mediador di Gobierno tratando na soluciona conflicto na Colegio Arubano

Ya caba a pone partidonan na mesa

• Diahuebs tabata un dia largo pero sin solucion
• Ministro Endy Croes tambe buscando pa nan sinta na mesa 

ORANJESTAD (AAN): Pa di dos dia consecutivo, e cura y portanan di Colegio Arubano den Vondellaan tabata habri.  Pero ningun docente a drenta pa asina duna les.  Tur di nan ta keda respalda nan Rector Tim Croes, cu nan ta convenci cu inhustamente a worde suspendi door di President di Directiva di SVOA.

   Y e docentenan tin mas motibo pa nan ta disgusta, esta cu hopi tempo nan tabata boga pa trece mehoramento na scol, y a hasta trece esaki dilanti na SVOA.

   Nan a keda desapunta cu SVOA casi no a duna nan oido.  Nan ta sinti cu SVOA no kier trece mehoramento.  Pero den nan Rector Tim Croes si nan ta mira cu e homber ta trahando pa bienestar di e scol.

   Pa tal motibo un biaha mas nan a keda para riba e parkinglot dilanti Colegio Arubano, y e biaha aki a hasta haya sosten di Alumnonan cu a presenta cu borchi “Nos kier nos Rector back”.  Nan tambe a bin cu uniform color scur pa uni asina cu e docentenan cu ta cu paña scur bisti.

   E docentenan tambe a bin cu T-shirt cu e emblema di mannan na otro cu e mensahe “We cannot be divided”.

   Despues cu a mira claramente cu pa di dos dia lo no tin les, y cu diferente proefwerk y examen no por a sigui.

   Y chens ta grandi cu awe Diabierna tampoco lo no tin scol.

   SVOA no kier bisa e motibo:  Riba Diahuebs, mayornan a keda sorprendi ora cu nan a haya un carta di SVOA, cu parce ta mirando futuro y a bisa cu tur proefwerk y S.E. a worde cambia pa 26, 27, y 28 di Januari 2022.

   Den e carta tambe, nan ta bisa cu nan no kier duna detaye di e suspension di Rector, y ta bisa cu en todo caso e no ta manera ta saliendo den prensa.

   A mustra tambe cu Diaranson anochi, e directiva di SVOA a reuni cu directiva di Sindicato Simar y dos representante di docentenan.  SVOA ta keda insisti cu tin un motibo valido pa haci un investigacion y keda cu e suspension.

   Ademas, directiva di SVOA a indica cu te Diaranson 26 di Januari, pues te otro siman nan lo tin chens di reuni cu e Rector.

   SVOA ta bisa cu Colegio Arubano ta habri, pero nan no por duna garantia cu tin les ta worde duna.

   Asina a bin cu e informacion cu ta preparando Casonan Sumario den Corte pa asina obliga e docentenan pa bay duna les.

   Mayornan cu campaña di firma: Mientras tanto mayornan tambe ta opinando mescos cu e docentenan, esta cu e directiva di SVOA ta laga hopi di desea. Y pesey un di e mayornan a start un campaña di firma online pa exigi retiro di e directiva actual.

   E mensahe duna ta: “Mayornan, ta momento pa nos para fuerte cu e maestronan y exigi pa e bestuur actual retira. E actuacion [...] pa cu Rector a duna un bista cortico con e manera di anda cu e personal ta! Ban sostene e maestronan aki, cu ta trahando cu nos yiunan den un situacion di stress, menaza, bao un directiva lidera pa un hende cu no sa nada di enseñanza, y cu no ta tene cuenta cu mayor nan opinion. Kico mas nos ta warda? Ban cuminsa cu un accion di firma, exigiendo e directiva pa nan baha y duna espacio pa hende capacita y cu amor pa enseñansa, dirigi Colegio Arubano.”

   Esaki a worde haci na e website di change.org unda te cu Diahuebs atardi 6:00 pm un total di 1.190 firma a worde registra caba.

   Esnan cu kier firma por bay na:

www.bit.ly/rectorcolegio

   Mediador a pone partidonan na mesa: Diahuebs mainta despues di a aglomera dilanti Colegio Arubano, e docentenan tur a mobiliza pa sede di Sindicato Simar unda a duna tur hende informacion nobo di e reunion cu Directiva di SVOA, y e contestanan cu nan a haya.

   Algo por mira claramente, ta cu e docentenan ta 100% tras di nan Rector Tim Croes.  Y esaki ta algo cu no por a mira ultimo decada na e scol aki di HAVO y VWO.

   Despues den oranan laat di mainta, Mediador di Gobierno a drenta den e asunto aki.  El a invita e partidonan pa sinta na mesa.  Y danki na esaki, por lo menos 2 Caso Sumario a wordo cancela.

   E no a soluciiona tur cos, pero a haya un adelanto.  A palabra cu tur dos partido lo bay bek den nan seno pa presenta loke a wordo dialoga.  Y e ora awe Diabierna atardi lo reuni bek cu otro, pa asina sigui dialoga pa mira unda por yega.

   Ministro a tene reunion: Den oranan di Diahuebs atardi, Ministro di Enseñanza Endy Croes a reuni cu Sindicato Simar y tambe representante di Docentenan.

   Preocupacion di Ministro tabata pa tin trankilidad, y pa e alumnonan no perde nan Proefwerk y S.E. cu mester a tuma lugar Diaranson, Diahuebs, y Diabierna.

   Despues di esey, Ministro a haci suplica na Directiva di SVOA pa nan presenta.  El a scucha nan banda, y a haci mesun suplica, pa purba haya otro na mesa y no perhudica e alumnonan cu nan CP-Week.  Como cu SVOA ta un fundacion cu ta cay bao di Obispado di Willemstad, e titular di Enseñanza no por obliga nan pa haci esey, y ni por mete.  Pero Ministro a bisa cu el fungi como un brug pa nan tur bay mesa, scucha, reuni, y pidi pa yega na un solucion.

    Ministro ta den contacto cu Inspectie Onderwijs tambe, cu tin di duna e permisonan necesario pa hala e CP Week y S.E. di scol.

   Pero Ministro ta spera cu tanto Directiva di SVOA, Sindicato Simar, y e Docentenan por pone poco awa den biña pa asina por yega mas cerca di otro, y resolve problema na bienestar general di alumnonan.