338 Miyon persona mundialmente afecta cu un malesa desconoci --- *Industria di vehiculo ta ehempel di entrada den un futuro nobo --- *Mundo no por sigui perde placa pero 5.57 Miyon morto ta un señal
ORANJESTAD (AAN) — Segun e planificacion na 2020 di recuperacion mundial despues di Covid-19, na e momentonan aki mundo lo mester a bandona e problemanan mas serio di Covid-19 y mester a duna inicio na un futuro nobo.
E realidad ta diferente.
Na entrada di 2022, mundo ta trata na yega na un formula pa “Biba cu Covid”, cu cada cientifica aparentemente ta duna su propio interpretacion en espera di mas resultado di cifranan cu a base di experencia cu a haya cu e malesa, ta trata di duna un indicacion di loke ta spera.
“Biba cu Covid” ta e expresion cu ta wordo lansa mientras mundo a alcansa un total di 338 Miyon caso pero tambe a despedi di 5.57 Miyon persona, cu ta wordo considera di a muri a causa di Covid-19.
Tin disputa si ta Covid-19 of enfermedad cu ya tabata existente a percura pa morto di tur victima di Covid-19. Si sigui e hecho cu ta e loke ta conduci directamente na morto, ta wordo considera e causa di morto, mester atribui e hecho cu 5.57 Miyon persona a muri debi na e Pandemia ocasiona pa e Coronavirus nobo.
“Biba cu Covid-19” ta bini dilanti den e forma cu ta atende cu Covid-19 actualmente na hopi pais, cu ta trata di convence nan mes cu Omicron ta e variante cu mas infeccion ta causa pero tambe un variante cu un efecto modera.
Con peligroso e forma cu ta atende cu e malesa actualmente ta, ta bini dilanti den declaracionnan di expertonan cu ta indica, cu Delta ainda ta presenta y cu no por considera Omicron un malesa inocente, pasobra e ta mata hende, sigur personanan cu no ta vacuna.
Si mundo na inicio di e Pandemia a tuma medidanan drastico, awe e propaganda cu Omicron no ta haci tanto daño, ta wordo uza pa comunidadnan “Biba cu Covid-19” mientras un vacuna nobo cu Omicron no por resisti mester mira luz na Maart y cientificonan ta papia di e posibilidad di un variante nobo cu semper ta posibel.
Hulanda a admiti cu e ta prepara su mes pa laga Covid-19 sigui move, loke ta e actitud di mayoria di pais, cu no ta introduci medidanan pisa den un mundo cu no tin placa mas pa financia e resultadonan di Covid-19 riba tereno economico, financiero y social.
Kico lo pasa si no tin suficiente trahador, no ta conoci.
Un parti grandi di mundo a adapta su mes na e riesgonan pa produccion por continua.
Uno di e sectornan cu por uza como ehempel di loke comercio mundial ta confronta, ta sigur e negoshi di industria di vehiculo.
Aumento di prijs di vehiculonan nobo lo ta un realidad na 2022, ora na entrada di e segunda parti di aña, ta spera cu tin suficiente chip y suficiente hende pa normalisa e industria.
Segun planificacion, e venta di vehiculo nobo lo subi despues di a cay drasticamente pa falta di produccion loke a haci cu na 2021 hopi cliente mester a cumpra un auto segunda mano.
Industria di vehiculo ta indicativo pa loke por spera di comercio mundial, cu lo adapta nan produccion na demanda nobo y desaroyonan riba cual nan a traha.
Vehiculonan electrico lo aumenta riba careteranan na un forma significante no solamente pa loke ta trata auto di famia pero tambe pickup cu lo core riba electricidad y lo bandona gasoline.
Sector di turismo ta adapta su mes mescos cu tur empresa mundial acapara experencianan di e pandemia.
Prijs lo subi pa practicamente tur producto na nivel internacional pa mundo cu mester cuminsa “biba cu Covid-19”.
Kico esaki realmente lo nifica tin atencion sigur di tur tipo di seguro, pero tambe organisacionnan mundial, cu ta trata di yega na e formula pa hende por sigui produci su pan di cada dia mientras e mester vigila su salud, pa evita cu Covid-19 ta destrui tanto su pan como su bida.
