Vocero di AF&BA: --- *Ademas di e falta di personal den e industria durante e pandemia
ORANJESTAD (AAN): Recientemente, e representantenan di Aruba Food & Beverage Association (AF&BA) a reuni cu Minister Geoffrey Wever y relaciona cu esaki, Natalia Schoofs-Delgado, PR di e asociacion, a splica cu den e reunion aki a combersa cu e mandatario riba e retonan cu tin na e momentonan aki di pandemia.
Banda di esaki a trece dilanti un situacion preocupante cual ta e no por haya e personal adecua of cu no tin personal.
El a revela cu no tin hopi hende cu ta postulando pa e posicionnan cu tin habri den e industria di cuminda y bebida. Adicionalmente tambe a combersa riba e tema di e reforma fiscal cu ta bay drenta na vigor na 2023 y cu ta uno cu ta trece preocupacion.
Tambe a manifesta e preocupacion riba e costo di bida na Aruba, di importacion y di e adkisicion di productonan.
E 'feedback' cu a haya di parti di Minister Wever tabata uno basta receptivo, e vocero di AF&BA a señala. "E tabata basta habri na nos ponencianan y tabata puntra nos pa posibel solucionnan".
A papia riba e tema di educacion tambe como un parti unda tambe e asociacion por aporta hopi pa trece cambio y den crea un cultura di identidad cerca esnan cu ta nace y crece na Aruba, pero cerca esnan cu ta yega pa bira parti di e comunidad', a agrega.
E vocero a sigui bisa cu traha na e industria aki no solamente ta nifica gana un salario of haya tips, sino cu ta realmente hiba e isla pa dilanti. "Esnan cu ta traha den e sector aki mester tin bon cla cu nan papel ta hunga un rol significativo den e economia di Aruba".
RETONAN DI E PANDEMIA
Segun AF&BA, no ta algo desconoci cu e industria di alimento y bebidanan a wordo severamente afecta. "No ta solamente e lockdowns, e orarionan di ciere, e cantidad di guest permiti na mesa, sino cu tambe a confronta tambe algun situacion pa loke ta e adkisicion di productonan pa motibo cu e prijsnan tambe a subi banda di e calidad cu tambe ta wordo afecta".
Por ehempel, aworaki hopi producto ta hopi mas caro y tin hopi aspecto cu e consumidor no ta realisa a base diario cu tin efecto riba e prijs. Por menciona e introduccion di forki di palo y saconan di papel.
A sosode cu te hasta mester a ahusta of kita algun opcion for di e menu debi na e calidad cu a baha, mientras cu e prijs si mester a subi. En general, e prijsnan no a wordo ahusta ainda, aunke si a haci cambionan chikito, pero locual si a haci ta e cambionan den e menu pa exclui cierto productonan of ingredientenan cu a bira hopi caro.
A largo plaso a pensa cu esey no lo a pasa, pero awor ta wak e consecuencianan di esey den tur sentido. No solamente den loke ta suministro, pero tambe den loke ta produccion.
