Mayra Cole a bira Empleado di Aña 2021 na Alhambra Casino and Shops

ORANJESTAD (AAN): Durante un ceremonia special, combina cu cena na Alhambra Casino Ballroom, gerencia e honra e empleadonan cu mas a destaca durante 2021.

  E tabata un aña cu yen di reto, pero toch a percura pa duna honor na esnan cu a sa di haci nan best durante e aña ey.

   Durante e anochi a honra e hubilarionan cu a cumpli sea 5 aña, 10 aña, 15 aña, 20 aña, 30 aña, y 35 aña trahando cu e compania.  Tambe a honra esnan cu a keda henter 2021 trahando sin bira un solo dia malo.

   E anochi aki, a conta cu discurso di Annie Dirksz (gerente di mercadeo), Jan ten Have (director di operacion), y un lectura a wordo duna pa Susan Varnes (president).

   Na final a anuncia cu e Empleado di Aña a bira Mayra Cole.  El a keda hopi contento cu e reconocemento aki.  El a ricibi su Envelop y Plaquette di ‘Crewmember of the Year’ cu un sonrisa grandi riba su cara.