ORANJESTAD (AAN): Mescos cu e añanan anterior riba 4 di mei Reino Hulandes ta conmemora esnan cu a fayece durante segunda guera mundial.
Na Hulanda un dia despues tambe ta celebra e liberacion for di e ocupador Aleman.
Awendia riba 4 di mei tambe ta conmemora miembronan di Reino Hulandes cu a fayece durante conflictonan militar (Indonesia) y tambe durante operacionnan di pas (Libanon, Bosnia y Afghanistan).
E conmemoracionnan ta consisti di un ceremonia cu ta ponemento di krans door di La Reina, familiares, representantenan di gobierno, militarnan, organizacionnan di resistencia y diferente organizacion y grupo den e comunidad.
Na Hulanda desde 6 ‘or di atardi te bahada di solo banderanan ta worde hisa halfstok. Tambe kloknan di misa ta bati desde cuarto pa 8 te 8’or y sigui pa 2 minuut di silencio cu un y tur ta respeta.
Esey kier men cu mas tanto posibel actividadnan ta ser para, manera transmision di radio y television, transporte publico y otro cosnan. Tur lusnan publico ta ser sendi pa asina un y tur sa ki ora e dos minutnan ta cuminsa y termina.
Na Aruba e conmemoracion ta consisti di un oracion di e religioso militar, ponemento di krans door di Gobernador, un discurso di Ministro-Presidente, ponemento di krans na nomber di famia di e fayecidonan y ex-combatantenan, na nomber di Parlamento, na nomber di Gobierno, na nomber di Representacion di Hulanda na Aruba, na nomber di personal y militarnan di marinierskazerne Savaneta y na nomber di e hubentud di Aruba.
E programa ta tuma lugar na e monumento situa na Adriaan Lacle Boulevard, cu lo ser sera pa trafico y lo tuma lugar di 5:00 pm te cu 6:30 pm.
Famia di civilnan y militarnan, excombatantenan, hubentud y publico en general ta ser invita pa presencia e conmemoracion importante aki.