Monton di pisca morto cu holor fuerte molestiando tur hende na Waf di Rancho

Tin un hende cu ta bentando hopi resto di pisca for di Pier

ORANJESTAD (AAN): Un situacion hopi fastioso a wordo detecta Diadomingo atardi na e beach cu tin net dilanti Waf di Rancho na Playa.  Piscadornan a bin mira cu eynan tin hopi pisca morto cu ta spulando na tera.

   Un di esnan cu nan a notifica, ta Clifford Rosa kende ta president di Fundacion Rancho.  El a acudi Dialuna mainta y enberdad a bin topa cu varios pisca morto, di cual hopi ta djis e cabez so a spula y yega riba e santo blanco.

   Y e holor cu e piscanan morto aki ta plamando den e area ta basta insoportable.  Piscadornan ta sospecha cu algo ta pasando y cu a pone e piscanan aki muri.

   President di Fundacion Rancho a confirma, cu el a core drenta den contacto cu Bureau City Inspector pa bin observa loke ta pasando, como cu e ta algo alarmante cu sigur tin di bay check mas specifico kico ta e causa.

   Sinembargo tin algun informacion cu ta mustra cu durante cierto momento di dia, lo tin hende ta yega na e Pier aki cu un baki yena cu ‘partinan indesea’ di pisca, e.o. e mondongo y cabez, y ta djis zwaai esakinan benta den lama.

   E restonan aki ta djis keda circula den e lama eynan y na final cu e biento fuerte e dianan aki, nan ta spula riba tera.

   Toch bo no por descarta e posibilidad cu tin otro motibo cu esaki ta socede, y pesey lo ta bon tambe pa check cada Pisca morto pa wak si lo por tin material toxico den nan curpa cu por a causa esaki.  Pero esey no ta splica con bin tabatin asina hopi cabez so di pisca.

   Si acaso ta un joker tin cu ta benta resto di pisca den lama eynan, e tin di tuma nota cu loke e ta haciendo no ta corecto.

   Clifford Rosa di Fundacion Rancho a indica cu tin hopi otro manera pa atende cu resto di pisca!  Den 2022 bo no por djis yega na Pier, y basha esaki den lama y despues subi auto y bay.

   Nan tin indicacion cu e persona cu lo a haci esaki, no ta uno cu ta frecuenta e Pier aki hopi, kizas den pasado si.  Of e ta djis un trahador di e Restaurant cu ta bin haci esaki, sin pensa riba e consecuencianan.

   Si acaso tin di bay educa e personanan na Aruba cu ainda ta ‘tira sushi den lama’, e speranza tey cu e ‘mind-set’ di e hendenan ey por cambia!  Pasobra nan no tin ningun interes di cuida Medio Ambiente.

   Tin peticion pa resto di Pisca cu bo por haci otro cos cune tambe.  Clifford Rosa a indica cu Fundacion Rancho mes a yega di haya pregunta di studiantenan di Universidad, pa sa kico piscadornan ta haci cu resto di pisca.  Ta fastioso pa habri e siman aki di Dialuna pa topa cu e desastre aki na Waf di Rancho.

   “Mi ta kere cu esaki ta un mal bista, y mi no ta apoya loke a socede,” Rosa a indica den un entrevista.  “Pa aworaki, nos ta keda pendiente pa haya sa kende a comete esaki y busca forma pa eduk’e”.

   Kizas un sancion lo ta na su lugar?  Ta parce cu e mecanismo pa duna sancion no ta full hinca den otro ainda.  Segun Rosa, si bo yama Marine Park, nan ainda no por yudabo.

   Tanten cu no tin regla, no por haci nada!  Fundacion Rancho tambe ta keda cu mannan mara, pero si no tin reglamento, e ora nan tampoco por haci mucho.

   Toch nan tambe kier haya sa kende a comete e acto aki, pasobra na Waf di Rancho bo no por bin haci e cos aki.

   Den pasado tabatin tradicion cu ora piscado ta limpia pisca captura na Waf mes, y despues ta tira e mondongo afo pa asina e parhanan Bubi por come nan.  Pero awor ni Bubi mes no tin mas.

   Pero e tradicion a cambia, pasobra awendia bo no por tira tur cos den lama mas, como cu bo no ta yudando e eco-sistema.  Pa traha riba e eco-sistema tin otro forma pa haci’e, y esey ta loke Fundacion Rancho ta haci cu e piscadornan aki, dunando nan educacion, pa nan ta mas conciente y pa nan por keda biba di pesqueria y pa tin un futuro den pesqueria tambe.  Pesey ta duna charla pa comparti conocemento.

   E tradicion di benta resto di pisca den lama tin di stop!  Aunke e biaha aki a mira un persona yega cu un ice-jug grandi, keriendo cu ta ijs e ta bay tira den lama, sinembargo ta cantidad di resto di pisca el a benta ey for di e Pier.

   Rosa ta convenci cu mas control lo yuda, sinembargo si bo no tin reglamentonan poni na ordo, e ta keda mesun cos.

   Un suplica ta bay na e persona, cu kizas ta benta resto di pisca di un Restaurant local for di e Pier aki, pa stop di haci esey.  Mundo a cambia, y e tradicion ey ya no ta aceptable mas awendia.