Mas paloma a cuminza crea situacion inhigienico den Caya Betico Croes na Playa

ORANJESTAD (AAN): E ta un diferencia grandi awor, compara cu Caya Grandi na Playa durante decada di 1990 y comienzo di 2000. 

Casi bo no tabata mira paloma mes den Caya Grandi.  Aunke tabatin algun si cu bo ta mira ta bula, y tabata forma neishi e.o. riba e balcon di La Linda, toch e no tabata asina problematico pa esnan cu ta haci compras.

   Den fin di siman, DIARIO a wordo mustra door di dos comerciante, cu awor si na 2021 ta parce cu palomanan ta birando doño di Caya Betico Croes y ta tur caminda cu bo pasa bo ta mira con sushi nan ta lagando acera, e bankinan pa sinta, borchinan di negoshi, y tambe hasta e rails di tram.

   Pues e situacion a escala asina hopi, cu awor nan ta considerando e cantidad di paloma den Caya Grandi como un molester awor.  Esaki ta bin debi cu e actividadnan normal di e paloma ta bin den conflicto di algun forma cu e actividad humano.  Nan a cuminza sinti nan mes safe den Caya Grandi y awor a reproduci na cantidad grandi.

   Ademas palomanan ta crece dn cantidad, y ta laga nan sushi tur caminda.  Nan presencia na Playa por bin debi cu lo por tin hende cu activamente ta dunando nan cuminda, of cu nan ta haya resto di cuminda benta tur caminda.

   Esey ta e motibo pakico varios municipio y ciudad rond mundo a tuma medida activo pa asina eradica nan, of a lo menos core cu nan di e area.

   Anto manera cu a ser mustra na DIARIO, algun di e palomanan aki den Caya Grandi ya no tin ni miedo mas di hendenan.  Bo ta haya nan abao ta relaha banda di acera, sin preocupa cu hende ta cana na banda.

   Otro caminda, por mira con nan a aglomera patras di un Condenser Unit di Airco colga pafor, y esaki ta yena cu sushedad.  E tecniconan di Airco cu ta bay haci service na e aparato aki kizas tin di proteha su mes hopi bon.

   Loke por haci:  Bo tin di purba preveni cu palomanan ta haya acceso na superficienan cu nan por baha y para.  For di dak di edificio y otro lugarnan adecuado pa nan baha despues di bula, corda cu paloma por comete vandalismo riba equiponan valioso, airco units, bo borchi di negoshi, vehiculo, acera, cu nan sushi cu ta hopi corosivo.

   Con bo ta core cu e palomanan aki?  Haci e area pafo di bo negoshi sinti un tiki mas ‘menazante’ pa nan.  Corda cu bo por bay molestia e palomanan pa asina core cu nan, pero evita di irita bisiñanan comerciante.  Aki bo por instala un sorto di wayanan tipo prikkeldraad pero special pa parha, cu ta mas largo.  Esaki por wordo poni banda di airco units.

   DIARIO ta corda con den pasado, Misa Santa Ana na Noord a core cu palomanan, door di instala un sorto di “bird jolt” cu ta un sistema low-profile electrico bo ta instala na bo rand di dak, of banda di airco, na rand di bentana, etc.   Si un paloma bin para na dje, e ta produci un shock suave na e paloma.  E shock aki no ta causa herida ni problema pa e paloma, pero e experiencia aki ta pone cu nan lo bay evita di bin den bo area.  E sistema aki a yuda Misa di Noord grandemente y a modifica e comportacion di palomanan.

   Tin di compronde cu companianan a inventa hopi otro sistema mas, e.o. uno cu ta bin cu speakers cu ta produci un sonido (di un parha mas grandi) cu ta spanta palomanan.  Pero tin chens cu e sonido ta spanta clientenan den Caya Betico Croes tambe.