Despues di a participa den e 'Young Voters Town Hall' - ORANJESTAD (AAN): Den entrevista cu Siouxsie Kock di Heart Centered Leadership el a duna di conoce cu a tene e asina yama 'Impact Cafe'
unda hendenan ta bin hunto pa papia riba diferente situacion cu ta preocupante y pa analisa kico ta bay bon, kico ta bay malo y pa wak kico ta e solucion.
E proyecto aki a cuminsa na Mei unda a invita departamentonan concerni pa papia riba medio ambiente, enseňansa, labor y salud mental, a splica.
Kock a agrega cu e representantenan di e departamentonan a duna e hobennan un presentacion unda e hobennan por a haci preguntanan teniendo cuenta tambe cu e situacion cu COVID-19 a trece cu ne.
E analisis tabata riba kico a pasa despues di e pandemia cu e temanan menciona.
Dos siman pasa e hobennan tabata tin e 'Impact factory' unda cu nan a haya training a base di e proceso electoral y tambe con pa haci pregunta y presenta nan mes pa asina nan por a scoge e politiconan cu nan kier a papia cu ne.
Asina a invita 6 representante di e 12 partido politico cu ta bay eleccion 2021. E preguntanan tabata mas tanto enfoca riba kico e partido ta haci riba e retonan cu nan ta wak pa e hobennan den futuro, con ta bay hacie, den ki tempo ta bay hacie y cu cual placa ta haci ehecut'e.
E evento aki a tuma lugar diasabra na e auditorio di Colegio EPI y tabata un 'Young Voters Town Hall'.
E meta di e evento aki ta pa e hobennan traha un manifiesto pa e gobierno nobo. Ta trata akinan di un grupo di 25 hoben y cu ta forma parti entre otro di Parlamento Hubenil, y otro organisacionnan.
Locual kier demostra tambe ta cu si kier traha algo pa Aruba tur mester uni, maske ta pertenece na organisacionnan diferente, Siouxsie Kock a declara.
