ORANJESTAD (AAN): Na Aruba, e Tram ta sigui pasa den Caya Principal sea cu man yen di turista, of hende local y ta haya algun splicacion di e operador.
Y bo ta mira con esnan sinta den Tram ta saca potret como recuerdo unico di ta coriendo esaki den un atmosfera tropical.
E unico cu sigur mester tene cuenta cune ta e Adictonan Ambulante cu ainda ta circula den centro di ciudad, y ta haci esaki sin preocupa cu ningun ley, y ta haci esey manera nan ta haya ta bon.
E Adictonan Ambulante ta cana pidi placa, cuminda, y awor tin hasta Adicto Ambulante stranhero cu tambe a forma parti di esnan local y e ta tristo pa mira!
Lamentablemente ningun pregunta encuanto con por soluciona problema di Adictonan Ambulante den ciudad no a wordo dirigi na politiconan durante Debate.
Hecho ta cu awor na 2021, lo tin di bay tuma medida pa evita e problema aki empeora y dado momento por trece un mal imagen pa turismo.
Ta di lamenta cu varios pais den region si a logra di soluciona nan problema di “chollers”. Pero na Aruba? Te ainda ningun gobierno, ni instancia a logra pa duna un man pa evita e problema.
Recien tabatin persona cu a mustra, cu na Huis van Bewaring cu awor ta un centro pa wanta esnan ilegal, que hubo pone eyden tambe un asina yama “Opvangcenter” pa Adictonan Ambulante, tanto homber como muher.
E ta doloroso cu hopi tata y mama, rumannan ta pasando den e problema y nan si ta buscando solucion pa e miembro famia cu a cay den droga y ta circula riba caya buscando lugar pa drumi.
Ohala e siguiente Gobierno lo por dedica un tiki atencion na esaki, pa asina busca un draagvlak mas amplio pa conhuntamente duna un man pa busca solucion, debi cu e isla no por sigui asina, hunto nos lo por logra yega na un solucion.
