Mas di 360 control medico haci durante Health Fair 2024

ORANJESTAD (AAN): Manera DIARIO a trece dilanti caba, recien un biaha mas Aruba Lions Club cu un bunita actividad

den comunidad caminda a concentra riba e tereno di salud y cu a kibra nan propio record cu e total di participante.

   E miembronan di Aruba Lions Club a sali un biaha mas den comunidad cu un proyecto caminda a organiza un dia cu pueblo en general por a pasa controla sanger pa e parti di diabetes y cholesterol, por a check peso, haltura y presion di sanger pa despues ricibi tambe un conseho medico, control di wowo y oido, tambe por a haci control y haya informacion di cancer di pecho, y sigur e proyecto di smile mobile di Aruba Lions Club cu tabata tey pa haci limpieza y reparacion di dentadura di esnan den necesidad pa esaki.

   For di 9’or di mainta e actividad a habri su porta na Xavier University cu e miembronan di Aruba Lions Club, cu e ayudo di e studiantenan y dokternan di Xavier University, Mary-Joan Foundation, Aruba Vision Center, The Specialist, FEPOH y Quota Club, caminda a ricibi un gran cantidad di ciudadanonan cu a kibra e record di participacion di aña pasa.

   E actividad tabata tin un duracion di 5 ora cu por lo menos 70 voluntario, cu a logra mas di 360 controlnan medico.

   Bunita comentario di e bishitantenan cu a keda agradeci cu e oportunidad y tambe unda a constata algun casonan di gravedad cu pashentnan a worde referi urgente pa controlnan avansa, cu a mustra e importancia y balor di e proyecto aki.

   Aruba Lions Club ta keda masha agradeci cu e apoyo cu nan a haya di tur instancia, organizacionnan y voluntarionan cu a haci esaki posibel y sigur Xavier University pa su personal y disponibilidad di e localidad.