ORANJESTAD (AAN): Durante un conferencia di prensa convoca na RCA Arena na Solito,
a toca honor na president Jeff Lopez di e organizacion deportivo aki, pa mustra cu durante 2024, nan ta bay ta celebrando e di 90 Aña di existencia di Racing Club Aruba.
E organizacion aworaki ta consisti di casi 300 miembro, cu ta varia for di e muchanan di 4 aña di edad, bay te cu adultonan di 35 aña, sin conta e boluntarionan, leidster, y coachnan cu ta yuda grandemente pa haci RCA keda un organizacion grandi.
Preparando pa tur esaki, RCA ta organizando un evento pa recauda fondo, cu lo tuma lugar fin di luna aki, esta Diadomingo 30 di Juni 2024. Esaki lo bay ta un Car-Wash grandi, cu lo ser teni for di 9:00 am te cu 2:00 pm. Nan lo bay haci uso di e facilidadnan di e negoshi ‘Clean Wheels Boulevard’, cu ta situa net panort di Citgo Boulevard. E lo bay ta un ‘outside-wash’ di bo auto of vehiculo.
Ya caba ticket pa e RCA Carwash aki ta obtenibel pa 25 Florin cerca tur miembro di RCA.
Lopez a splica, cu e fondo cu ta wordo recauda aki ta pa yuda nan den e proyecto pa renoba diferente instalacion na nan tereno, incluyendo instalacion nobo di luznan pa esnan cu ta mas eficiente, mas briyante, y cu ta wanta mas hopi.
RCA a caba di renoba tur nan cura rond di nan stadion, y awor ta e parti di luznan ta bay haya turno. Fuera di esey, RCA Arena tambe a wordo aproba door di FIFA, pa bay haya un veld di turf artificial tambe mas pronto posibel, y pa esaki nan kier ta completamente prepara.
