Mariniernan Mericano y Hulandes ta finalizando training na Aruba

‘Caribbean Coastal Warrior 2025’

ORANJESTAD (AAN): Actualmente tin un training riguroso andando na Aruba, na cual Mariniernan Hulandes y tambe esnan di US Marine Corps ta participando na dje.

   Ya desde 9 di Mei nan a start cu esaki, y e ta poni pa finaliza riba Dialuna 9 di Juni venidero.  E ekipo di buceo di 2ndo Batayon di Reconocemento, 2do Division di Marina, di US Marine Corps ta na Aruba pa e ehercicio yama ‘Caribbean Coastal Warrior 2025’.  Durante e training anual di buceo aki, e Mariniernan Mericano ta traha hunto cu Escuadron di Marina Caribense cu ta staciona na Aruba.

   DIARIO a compronde cu e training aki ta forma parti di un programa di intercambio entre Marina Hulandes y Mericano, durante cua e ehercicio cu intercambio den tanto region Caribense como na Merca.

   Algun siman pasa, na April 2025 mes, a tuma lugar na Camp Lejeune na Merca (base di US Marine Corps) a ehercicio di Caribbean Urban Warrior, durante cua Mariniernan di Scuadron di Marina Carib Aruba, e destacamento di Marina St. Maarten, ademas di e gruponan di boto di Aruba y Curaçao, a train hunto cu Mariniernan Mericano.  Training y ehercicio conhunto den ambos pais ta reforza e colaboracion entre e cuerponan.  E ta promove lazonan mutuo y ta ofrece oportunidadnan balioso pa siña di otro.

   Training actual di buceo ta andando na Aruba, y ta enfocando riba habilidad tactico di buceo cu un respirado (‘rebreather’).  E training ta wordo haci cu varios ekipo y buceo di US Marine Corps.