MEP ta di acuerdo cu CAFT:
ORANJESTAD (AAN): E problematica di Bubaliplas no ta uno desconoci pa comunidad. E ta un problema cu pa añanan largo tabata causa molester, y a percura pa hopi caso contra pais Aruba den corte, ademas di tabata afectando nos turismo. Aruba ta profila su mes internacionalmente como un destinacion di calidad. Y pa keda mantene e bon nomber, Bubaliplas a bira un emergencia nacional y tabata mester di solucion urgente.
Intentonan pa Gobierno aloca fondo, a wordo frustra pa CAft den 2022, y hasta a menasa Aruba cu un KB si sigui cu e inversion ey. Pa e motibo aki Gabinete Wever-Croes, cu aprobacion di Parlamento di Aruba, a privatisa RWZI un aña pasa y traspasa e plantanan pa AWSS, un compania estatal mescos cu AAA, SETAR, APA, WEB y ELMAR. Durante tratamento di e privatisacion den Parlamento, ta hopi informacion a wordo comparti y documentonan a wordo suministra. Por cierto, tur e informacion aki ta disponible cerca tur e parlamentarionan y ministernan cu e tempo ey tabata den Parlamento y gobierno.
E structura aki ta segun consehonan e unico forma cu ta duna e compania estatal e libertad y autoridad pa busca financiamento riba mercado local pa cumpli cu su inversionnan cu como compania ta considera di suma importancia y necesario pa su funcionamento.
GABINETE WEVER-CROES A WORDO ASISTI PA U GRUPO DI PROFESIONALNAN RIBA E MATERIA
A lanta un stuurgroep, consistiendo di representantenan di e tres ministerionan encarga cu e proyecto aki:
- Ministerio di Naturalesa, cu a apunta como lider di e stuurgroep señor Jossy Figaroa.
- Ministerio di Infrastructura, cu a apunta DOW y DWJZ pa e asuntonan huridico.
- Ministerio di Energia, cu a apunta Utilities Aruba NV.
E stuurgroep a haci uzo di expertonan internacional manera RoyalHasKoning riba e materia, y asina a presenta nan conseho con ta miho pa soluciona e problema di RWZI.
AWSS TA BUSCANDO FINANCIAMENTO RIBA MERCADO LOCAL
Inversion total, conforme informacion suministra durante e tratamento di privatisacion den Parlamento, y conseho di DOW y RoyalHasKoning ta di 250 miyon florin den un periodo di 5 aña. E inversion cu por cierto ta pa mehoracion y modernisacion di e infrastructura di e sistema di drenahe (riolering) pa Aruba completo, y lo resulta den un expansion di e capacidad di e plantanan aki.
AWSS ta actualmente den proceso di busca e financiamento riba mercado local, pasobra sin e financiamento, e plan di modernizacion y expansion no lo por wordo concretisa y ni tampoco ehecuta. Te na e momento aki NO tin financiamento comprometi. Sinembargo, awor cu tin surplus, Fraccion di MEP ta di acuerdo cu CAft, cu Gobierno di Aruba por presta e placa na AWSS, na interes hopi mas abou.
