Marilis Becker a hiba nan den ambiente di Status Aparte 40 aña pasa

Mirto Lacle, co-organizador di evento pa un bon comienzo di 2026:

ORANJESTAD (AAN) Señor Mirto Lacle, Gestor Cultural y co-organizador di e evento cu a tuma lugar na Biblioteca Nacional, Diahuebs anochi, den un entrevista cu DIARIO, a elabora tocante e actividad aki cu tin e meta pa un bon comienzo di aña 2026.

   Señor Lacle a describi e programa como uno masha amplio cu a trata di musica, arte, y literatura den dje, den cual Marilis Becker a recita un poema emblematico, di aña 1985, net na drempel di Status Aparte di Aruba. Ademas el a haci un composicion propio, señor Lacle a señala.

   “Kiermen, Marilis Becker a hiba nos den e esfera di Status Aparte, 40 aña pasa. Pues ta p’esey nos kier duna un pabien grandi na pueblo di Aruba, pasobra nos ta caba 40 aña siendo cu e otro islanan na 2010 nan a bira. Fuera di esey nos tabata tin e Escultor profesional Maritza Erasmus, ken a para un rato na e man di e ser humano”, señor Lacle a relata.

   “E tin e dote di a traha man di sernan bibo y sernan cu no tey mas. Y nos por a mira con Robert Jeand’or y Etty Toppenberg a keda representa, pero nos tin un Padu Lampe tambe, y asina’ki nos tin e celebracion aki, pa esnan cu a bay nos dilanti, en special personanan cu a hiba e nomber di Aruba den exterior, manera Hilward Croes tambe”, señor Mirto Lacle a agrega. El a invita e publico presente pa pasa aprecia e mini-expo cu Maritza Erasmus a traha, como memoria.

   Tabata tin tambe e Banda Notas de Amor, di Shurby Maria, Juan Tromp, Remi Flanegin. Fio Western no por tabata presente pa motibonan di salud.

“E banda aki a cuminza cu musica di aki, di Caribe, hiba nos te nos antepasadonan, e grandinan di Dande, y Aruba Bonaire y Curacao tabata presente, mientras cu un ekipo di media a hinca tur esaki den otro na un manera special”, señor Mirto Lacle a relata, den e entrevista cu DIARIO.