Gino Frans, Director di Stichting Eliezer:
ORANJESTAD (AAN): Hobennan di awedia tin mas conocimiento riba droga cu nunca prome. Pa medio di social media, telefon y internet, nan ta haya tur informacion y sa unda pa haya droga y con pa uza nan—hopi biaha nan sa mas cu autoridad y profesionalnan den e area. Esaki ta haci e problema di droga bou nos hobennan mas grandi ainda cu antes y alarmante.
Segun señor Frans, Director di Stichting Eliezer, esaki no ta un problema di awo y e ta sigui crece y birando pio. Señor Gino Frans ta di opinion cu tur esnan cu ta traha den e veld aki, entre otro Respaldo, Stichting Hunto, Stichting Eliezer, Gobierno y otronan, mester sinta hunto y yega na otro pa hunto traha plannan pa adresa e problematica aki. E ta enfatisa cu Aruba tin profesionalnan cu tin potencial pa traha hunto pa logra miho resultadonan.
Señor Frans a expresa cu mester habri un centro solamente pa hoben remarcando cu na Aruba tin hopi luga bashi cu ta bayendo atras cu por wordo uza pa e meta aki pa brinda nos hobennan cu ta cay den droga ayudo apropia y professional na nan mes un pais.
Un factor cu ta hiba nos hobennan na droga for di un edad hopi young, ta cu mayornan ta traha mas di un trabao lagando nan yiu atras sin supervision, of famianan cu no ta conta cu apoyo di un tata, cu ta bandona nan responsabilidad cu nan yiunan. Cambio, señor Frans a enfatisa, ta cuminsa na cas.
Sugerencia cu señor Frans tin pa mayornan ta pa keda papia cu nan, y cuminsa papia ya ora e mucha ta chikito, pasobra cu tur media y internet, muchanan ta haya informacion y prome cu e mayor ripara, ya e mucha sa hopi. No tene miedo pa papia cu nan, no balota nan pa nan edad young, pasobra nan sa mas di loke nos ta pensa.
