Turistanan a divulga e pesadiya di nan Hit & Run na Bubali

Nada ainda di e Pickup preto cu a huy

• E mesun dia ey nan dos a yega Aruba pa vakantie
• E señora keto bay den Intensive Care na Aruba 

ORANJESTAD (AAN): Pueblo di Aruba no por lubida un otro caso serio di Hit & Run cu a socede na final di December cu a pasa.  Tabata Diasabra anochi dia 27 di December, poco despues di 7:50 pm, cu yamadanan urgente a cuminza drenta na Central di Polis, pa indica cu auto a caba di dal dos peaton femenino den Caya Musica, direccion panort pa Bubali.

   Mesora a despacha unidad di Polis di Noord, como tambe di Oranjestad y Santa Cruz pa e lugar di desgracia, y notifica Centro di Alarma cu a cuminza manda 2 unidad di Ambulance pa e area.

   E prome unidad di Polis cu a yega, a bin nota cu berdad den Caya Musica, riba e pida cu ta move di Cunucu Abao bay nort pa Bubali, tin dos dama turista benta abao na suela, parti pariba di caminda.  Esaki ta e area unda yerbanan ta yega cerca di caminda, pues casi no tin acera pa cana riba dje.

   E auto of vehiculo cu a dal nan, zwaai ambos dama turista pariba di caminda.  Despues a djis sigui core, pues el a bira un caso di Hit & Run.  Mas unidad di Polis cu a cuminza yega, a yuda coordina pa cera e caminda.  E dos damanan a cay na un distancia di como 4 meter leu for di otro.

   Paramediconan cu a yega, mesora a cuminza atende esnan herida, y a nota cu e dama turista adulto tin golpi hopi grave.  E otro dama turista ta su yiu muhe, y tambe ta herida cu golpi na cabez, pero djis un tiki menos gravedad.

   Testigonan eybanda a splica cu nan a tende un golpi y ora di bira nan cara, a mira con e dos damanan aki tabata wordo “gezwaai” den halto y cay pariba den e pida cu yerba.  Nan a mira cu no ta un auto, sino ta un vehiculo tipo Pickup color preto, cu no a ni stop y a djis sigui core bay nort direccion di e rotonde di Bubali banda di Bubali Food Center.

   Cu urgencia a transporta ambos herido rumbo pa Servicio di Emergencia na Hospital pa tratamento medico.  Pero despues di esey prensa no a haya ningun informacion mas di e victimanan.

   Famia mes ta relata: Pero e siman aki, pa prome biaha ta bin haya sa cu un di e damanan turista a duna relato di loke nan ta pasando aden ainda.  Esaki a wordo skirbi door di e yiu muhe Michelle Rodriguez.

   “Loke mester tabata un vakantie alegre di Fin di Aña, a comberti den un tragedia cu a kibra nos curason.  Diasabra 27 di December, ami cu mi mama a yega Aruba pa nos vakantie.  Desafortunadamente, mientras cu nos ta cana pa bay cumpra comestibel, nos tabata envolvi den un accident Hit & Run cu a laga nos tur dos seriamente herida, y mester a wordo atendi cu urgencia.  E chauffeur a huy di e lugar, lagando nos benta riba caminda, y si no tabata pa e amabilidad y actuacion rapido di e ciudadanonan cu tabata cerca, e ora ami cu mi mama lo no tabata aki awe.”

   Keto bay den Intensive Care: “Debi cu e accident a socede pafo di nos pais, tabata dificil pa traha cu nos Aseguro, cu ta nenga di cubri tur nos gastonan medico,” e yiu muhe a skirbi.

   “Ami mes a sostene un herida grave na mi cabez cu mester a wordo opera.  Bon mes, cu mi ta recuperando bon, pero e condicion di mi mama ta kedando critico.  E ta aworaki den Intensive Care Unit cu un herida cerebral traumatico, nuebe ribchi kibra, y un pulmon a colapse.  E deseo di mas grandi di famia aworaki ta pa trece cas pa e por ricibi atencion y rehabilitacion cu e mester di dje.”

   E yiu muhe a sigui splica cu te ainda no a haya e chauffeur, y nan famia ta sperando di bay haya cobranzanan grandi di cuido medico y necesidad di cuido continuo net den e momento dificil aki,.

  “Nos a cuminza recauda fondo pa por sostene nos gastonan medico inmediato y di termino largo, mientras cu nos ta recuperando di e incidente tragico aki.  Como un persona cu mi ta haya duro pa pidi yudansa, esaki no ta facil pa mi, pero aworaki ami y mi famia tin mester realmente di sosten di tur hende.”

   Riba e website di GoFundMe, el a start siman pasa cu un campaña online di recauda fondo.  Su meta ta pa yega na 40 mil Dollar.

   “Nunca nos a imagina cu nos ta haya nos den e posicion aki, cu miedo, cansa, y haciendo oracion pa nos wordo sana, pero aworaki, nos lo kier ricibi sosten di comunidad mas cu nunca.  Ningun palabra por describi e miedo y dolor du nos famia a experiencia den e temponan dificil aki,” Michelle a indica.

   Esnan cu kier yuda haci donacion, bay na e website aki:

www.bit.ly/turista26

   E turista Michelle a indica cu ningun suma di placa ta demasiado chikito, y nan ta profundamente agradeci pa cualkier placa cu publico por aporta pa yuda nan supera e momento inimaginabel aki.

   Riba e potret por mira momento cu Michelle y su mama ta canando pa drenta avion pa bula bin Aruba, sin sa cu algun ora despues nan lo ta benta abao gravemente herida riba caminda na Bubali.

   Polis di Aruba keto bay ta pidi cualkier hende cu tin informacion di un Pickup preto cu desde fin di aña pasa na tur kibra debi na e caso di Hit & Run, pa duna informacion na Tipline di Polis na 111-41 pa yuda soluciona e caso.