Maria College orguyoso di dos alumno cu a gana premio den Coding di Computer

Pa algun tempo caba, tin un grupo na Aruba cu ta dedica pa yuda stimula hobennan di diferente edad,

pa nan cuminza traha cu coding riba computer pa por crea nan mesun apps, website, y wega.  El a bira conoci como ‘Aru Coder Dojo’, cu ta duna lesnan gratis pa muchanan di 7 aña bay ariba te cu 17 aña na Aruba.

   Na un Dojo, e participantenan ta wordo yama ‘Ninjas’, y nan ta siña con pa traha cu code, con pa desaroya website riba Internet, con pa traha Apps, programanan, y tambe wega.

   Nan a bira parti di un movimento global di lesnan cu ta wordo duna danki na boluntarionan rond mundo.  Fuera di esey,  de vez en cuando ta organiza competencia pa asina mira kendenan ta mihor posiciona pa traha algo nobo segun e tarea cu ta wordo pidi.

   Recien a organiza un competencia, cu a wordo yama ‘Moonhack Project’, cu ta un reto ofreci pa Code Club Australia pa tur grupo mundialmente cu ta traha cu coding.  Na esaki, Aru Coder Dojo tambe a participa.

   Na final di esaki, a bin haya sa cu dos di e miembronan di Code Club cu ta alumnonan di Maria College MAVO na Aruba, esta Jean-Luc y Kelvin, a logra gana y a ricibi nan Moonhack Changemaker Certification.

   Lo mas interesante ta cu un di e proyectonan di Aruba, a wordo selecta pa e Final 1000 Showcase (for di 35.000 ofreci rond mundo).  Sigur palabra di pabien na e team di Aru Coder Dojo y tambe Full Stack Vision Foundation.

   Na Maria College tabatin hopi alegria cu nan dos alumnonan a logra asina hopi!  Tambe a felicita nan docentenan, esta Juffrouw Rhadyn y tambe Meneer Figaroa cu tey tur Diamars pa motiva y encurasha e alumnonan hunto cu Aru Coder Dojo.  Sigur danki pa a crea e plataforma pa e alumnonan por sigui desaroya nan habilidadnan.