Marca local ARUBIANO a entrega imagen di Nos Dushi Birgen di Alto Vista na Legadonan di Noord

ORANJESTAD (AAN): “Bo no a logra nada di berdad te ora cu bo a sirbi bo prohimo”.

  No tin nada manera e momento asina emocional aki, ora bo ta mira nan bista asina sincero y gratificante den nan wowonan.

   E homber y muhenan aki, cu ta parti importante di cultura y patrominio di Aruba, cu a traha, guia, y lanta generacionnan cu tur nan curazon y alma.  Esaki tabata momento cu durante evento di ‘Noordflix’ na Centro di Bario Noord, a honra cinco legado di henter distrito di Noord.

   E legadonan di Noord cu a wordo honra tabata Jacobo Pedro Henriquez, pa inculca e amor pa Dios y oracion.  Tambe a honra Violeta Frans pa su aporte na Cultura y Arte.

   Tambe a honra Pedro ‘Perucho’ Gonçalves pa su aporte na comunidad y trabao social.  Tambe na Frans Wolff, e persona cu gusta chasco y harimento, a wordo honra pa su servicio y aporte comunitario y tambe social.  A honra tambe Francisca Duarte pa su gran ehempel den educacion.

   Dios bendiciona cada uno di boso y famia.  E imagennan cu ta replica di e Birgen di Alto Vista, a wordo haci cu hopi cariño y respet pa e marca local ARUBIANO, como un aporte special na e bunita trabao di balora nos grandi- y legadonan.  E compania ta sinti cu ta nan deber di balora y reconoce e baluartenan aki, como cu nan “ta nos hendenan”.