Parlamentario Xiomara Maduro ta gradici Ivan Quandus pa conserva nos tradicion

Fabuloso documentario di Caha di Orgel

ORANJESTAD (AAN): Parlamentario Xiomara Maduro ta felicita sr. Ivan Quandus cu su bunita documentario “Historia y preservacion di Caha di Orgel di Aruba”, un proyecto cu ta honra y conserva un parti esencial di nos identidad cultural.

   Maduro ta acentua e importancia di documenta nos historia, y specialmente nos tradicion musical, manera esun di cah’i orgel, cual pa hopi generacion a forma parti di bida diario y celebracionnan di nos pueblo. E instrumento aki ta un simbolo di alegria, union y herencia cultural den curason di Aruba.

   Segun e parlamentario, iniciativanan manera esaki ta fundamental pa sigura cu e conocimento, e storianan y e balor cultural di nos tradicionnan no perde, sino keda preserva pa futuro generacionnan. “Documenta nos historia ta clave pa mantene nos identidad bibo. E documentario aki ta un paso importante den e direccion corecto,” Maduro a expresa.

   Cu e obra aki, sr. Ivan Quandus ta contribui significativamente na e preservacion di nos patrimonio cultural musical. Su esfuerso ta sirbi como un inspiracion pa e comunidad, specialmente pa nos hobennan, pa nan por aprecia, proteha y continua cu e bunita tradicion di cah’i orgel na Aruba.