Mañan tin e soft opening di JOIA by Iberostar

E lo start cu como mitar di e 240 cambernan

ORANJESTAD (AAN): Manera cu DIARIO a splica detayadamente aña pasa den un relato, e Hotel nobo cu ta casi cla riba e tereno unda antes tabata POVA Club na Eagle Beach, y cu ta carga e nomber di JOIA by Iberostar, tin planea pa tene un softopening sin gran buya riba Diaranson, esta mañan.  Esey ta momento cu nan prome 80 pa 100 huespednan cu a haci reservacion lo bay check-in pa goza di nan estadia na e resort di mas nobo.

   E apertura grandi y oficial mes lo bay ta na primavera (‘spring’) di otro aña.  Durante un bishita di DIARIO na e lugar aki, a bin nota cu Contratista ta ocupa ta haciendo trabaonan chikito, principalmente na e parti dilanti den parkinglot, e parti zuid, y tambe e parti pa bay beach pa asina haci acceso mihor.

   Pero por lo demas e lugar ta completamente cla, y tur camber den e parti di e hala banda panort ta full cla.  Front Desk y lobby ta cla, e lobby Cafe ta cla, incluyendo e Bar grandi y Infinity Pool cu tin na segundo piso.

   Restaurantnan tambe ta cla, mesun cos por bisa di e fenomenal Spa, y e area importante di ‘Star Prestige’, cu ta un espacio specialmente pa huespednan di Iberostar cu ta miembro di e club exclusivo aki.  Nan ta haya espacio apart cu nan mesun piscina, mesun lounge, y mesun lugar pa come.  Tur di nan cu e diseño y uso di color unico cu e arkitecto y diseñador di e proyecto a escoge.  E colornan di lama y e blauw di Aruba ta resalta tur caminda.

   Manera cu Director General Arnaud Le Lanchon a splica, cu ora e huesped drenta e Lobby, bo ta sinti comosifuera ta bao lama bo ta.  E murayanan di e Lobby ta decora cu simbolonan di coral, cada pilar tin mas ariba figuranan di coral di diferente color, y tin hasta tubo decorativo na halto cu ta indicativo cu ta bao lama bo ta.

   E escogencia di color ta wordo enfatiza den tur skina di e Resort, incluyendo decor y obhetonan di bao lama.  Algo cu Iberostar ta hopi famoso pe na su resortnan rond mundo, ta e muebelnan cu ta wordo fabrica special pa nan.  Y e JOIA na Aruba tambe ta showcase di e ultimo di mesa, wandmeubel, y stoelnan cu nan tin.

   DIARIO a nota cu nan tin hopi trahador Arubiano, y esnan residente cu permiso, cu a bin di diferente resort y awor a bay busca trabao eynan.  Cu nan experticio, nan ta garantiza cu tur huesped lo haya e servicio fantastico cu Iberostar ta conoci pe rond mundo.  Di exterior a bin algun persona cu a duna training y a keda cla cu esey caba.

   JOIA by Iberostar lo bay ta un Hotel pa famia completo por hospeda, aunke tin un seccion di Infinity Pool cu ta solamente pa adulto.  E seccion di Spa ta extenso cu diferente sala di massage sea pa persona single of pa pareha.

   Rond mundo tin hopi huesped cu ta viaha pa un pais solamente ora cu tin un Iberostar eynan pa nan hospeda.  Y awo Aruba tambe tin uno, y asina ta habri caminda pa e huespednan aki awor pone Aruba tambe riba nan mapa di pais pa bin haci bishita.