Malhechornan a horta varios articulo di balor na FEPO

ORANJESTAD (AAN) – Fundacion FEPO a haya bishita di malhechornan den fin di siman, dos anochi consecutivo. FEPO ta informa cu a ser horta algun cos di balor, manera

un celular

cu FEPO a ricibi como donacion di SETAR y cu tabata uza pa comunica cu su clientenan cu problema di oido, cu no por comunica verbalmente na telefon. Tambe a horta dos otoscoop, cual ta e aparato pa wak den e horea, y algun cos mas di balor. 

Ademas, a horta algun t-shirts di Quota Club Aruba. Esaki ta e t-shirtnan blauw scur cu e miembronan di Quota ta bisti durante carnaval pa bende earplugs. Un aviso pa comunidad ta, cu si e dianan aki un persona cu un t-shirt di Quota acerca bo pa un peticion di donacion, den nomber di Quota Club, sea cauteloso y no honra e peticion aki, ya cu tin t-shirts ta circulando na Aruba cu lo por wordo malusa den nomber di Quota.

FEPO semper a traha duro pa sirbi nos comunidad cu tin problema di oido, como tambe muchanan cu tin dificultad den area di comunicacion. Actualmente FEPO ta remodelando su oficina pa por brinda un miho servicio na su clientenan. E ta un lastima cu ta dicidi pa kibra den un lugar na unda clientenan ta atende pa cuido di nan salud y bienestar, y sigur ta spera cu esaki no lo pasa mas.