ORANJESTAD (AAN)-- Desde cu COVID-19 a haci su entrada na Aruba, e meta tabata pa salba bida di nos ciudadanonan di 60 aña of mas y di esnan cu condicion di salud fragil cu tabata esnan di
mas afecta pa e virus.
Cu yegada di e diferente otro variantenan di e virus, rond mundo y na Aruba tambe, a tuma nota cu ya no ta nos adulto mayor di 60 aña so tabata na riesgo pero tambe esnan bou 60 aña. E variante nobo conoci como e variante Britanico, a sa di tuma over y ta ocasionando infeccion y ingreso den hospital di nos adultonan hoben. Esaki ta e motibo pakico awor ta di gran importancia pa nos adultonan hoben entre 18 cu 60 aña tambe proteha nan salud y tuma e vacuna.
Door di vacuna bo mes, no solamente bo ta protehando bo mes, pero tambe bo ta yuda proteha un otro persona cu por ta no por vacuna debi cu e ta bou 18 aña of su condicion di salud no ta permiti esaki. Mas persona vacuna, asina nos hunto por forma un barera di proteccion rond di esnan cu no por vacuna.
Vacuna ta un acto solidaridad y responsabilidad conhunto pa yega na e inmunidad colectivo, pa caba cu COVID -19 na nos isla y por bolbe na un bida mas normal posibel.
Den e lucha contra COVID-19 ningun persona mag keda atras of sin proteccion. No mas tristeza, ni mas morto na nos isla. Di awe pa dilanti Aruba ta sigui, positivamente, den e lucha contra COVID; hunto, nos ta vence COVID-19 y ni un hende lo keda atras. Sea solidario y responsabel ta e yabi pa nos recuperacion!
