Mainta tristo ora cu a bin haya Johnny Habibe morto na su cas

Aruba a perde un gran maestro den radio

ORANJESTAD (AAN): E ultimo siman di 2024 ta bay keda marca como uno tristo, caminda un personahe legendario cu un carera largo den radio difusion na Aruba, a ser haya morto riba cama na su cas na Caya Ernesto Petronia 86, cu ta net banda di e emisora Hit 95 FM.

   Mesora a bati alarma y core pidi presencia di Ambulance pa bay eynan.  Centro di Alarma cu urgencia a despacha un unidad eynan. Paramediconan a bay den e cas, y a haya un persona riba cama cu no ta duna señal di bida.  A keda nan nada otro di manda busca Docter, cu a yega y constata morto di e doño/director y locutor John Alex Habibe, conoci den pueblo como ‘Johnny Habibe’.

   Sin duda un di e locutornan mas conoci na Aruba, esey ta bin debi cu como hoben el a drenta mundo di radio difusion y su voz a bira uno di esnan mas reconocibel riba e isla.

   Comienso di su carera: Den decada di 1960 caba por a tende su voz riba frequencia di 1320 kHz di emisora Voz di Aruba, y cu su voz suave y di pronunciacion y articulacion perfecto, e tabata presenta su programanan.  El a wordo impulsa door di defunto Adisson Croes pa bay papia na radio.  Fuera di esey, Johnny mes despues a bira catalizador pa pusha mas hoben drenta den e mundo di radio difusion, y aki por menciona e.o. e locutor Victor Pietersz kende den decada di 1970 riba insistencia di Johnny a cuminza traha na Voz di Aruba.

   Johnny ta un persona cu a educa su mes, y a sigui estudio den mundo di locucion na Venezuela, y a keda mantene algun lazo estrecho cu medianan na Venezuela, incluyendo e famoso Radio Caracas Radio.  El a siña y a sa di domina tur forma corecto con pa papia na mic, y ta un persona comprensivo, cu bo por papia cune.  Pesey e tabata haya hopi yamada telefonico ora e ta den aire, ya cu oyentenan gusta combersa.  E tabata activo tambe den final di decada di 1970 riba CB Radio.  Den decada di 1970 el a bay traha tambe na Radio Kelkboom riba 1440 kHz cu su studionan e tempo aya den Emmastraat na Playa.

   Na final di decada di 1970 el a muda bay pa Radio Carina FM y a haya e time-slot mas importante pa e epoca ey, pues e horario di 2:00 pm pa 5:00 pm.  Aunke el a yama su programa ‘Johnny’s Goldies’, e tabata toca tur musica contemporaneo y a kibra record di sintonia e tempo ey den decada di 1980.  Tabatin algun hende cu eroneamente tabata skirbi ‘Johnny’s Oldies’, pero su programa semper tabata ‘Johnny’s Goldies’.  Su programa varia tocando musica cu mas ta ser pidi e tempo ey, hunto cu rifamento di premio y manda ‘peticion’ den aire, a haci Johnny aun mas grandi.

   E tabata presenta tambe show di Top 40 semanal, cu tabata sigui atrae audiencia.

   Tabata den decada di 1990 ora cu Radio Galactica 99.9 FM a habri, Johnny a bay traha eynan tambe.

   Posteriormente el a muda pa Canal 90 FM caminda cu el a sigui presenta su programanan na un forma diferente cu ta atrae oyente.  E tempo ey den un entrevista cu DIARIO, el a yega di splica cu su deseo ta pa maneha un emisora.  E tin algun idea cu por bay resulta exitoso pa Aruba.  Pero e emisoranan existente e tempo ey no a mustra interes pa cambia nan management.  Asina el a tuma e riesgo pa aplica pa obtene su mesun licencia di radio na Aruba.

   Su mesun emisora: Den decada di 1990, Johnny Habibe su soño a bira realidad ora cu el a habri su mesun emisora riba frequencia di 94.1 MHz riba banda di FM.  El a dune e nomber di ‘Hits 94’ cu studionan instala den e tempo ey Boerhaavestraat y cu despues a cambia di nomber pa Caya Ernesto Petronia na Ponton.  Su antenna mes tabata instala riba Sero di Hooiberg.

   Despues di tempo, Johnny Habibe a aplica y a obtene su di dos radioemisora na frequencia 88.1 MHz riba banda di FM.  El a dune e nomber di “Mega 88 FM”, y studio tambe ta na Ponton.  Pa e emisora aki, el a instala e antenna na Ponton mes.  Despues el a pone un otro mast banda di esey, y a realoca e antenna di Hit 94 for di Hooiberg y pone tambe na Ponton.

   Su forma di programacion a bin ta diferente, y e mes tras di mic tabata presenta noticiero, y atardi tabata duna su show na radio.  Den fin di siman e tabata percura pa e programa di ‘Aruba’s Top 20’.

   Fuera di esey, algun biaha el a presenta tambe algun Talkshow produci pa Gobierno unda e tabata entrevista Ministronan y demas dignatario.

  John Alex Habibe a nace na Aruba dia 11 di Februari 1954, pues a fayece cu 70 aña di edad.  Su carera a core pa 56 aña den mundo di radiodifusion.

   Na famianan di Johnny Habibe, su yiunan, mama di su yiunan, empleadonan, coleganan di radio, di parti DIARIO y famia Mansur, ta bay palabranan di profundo condolencia.