Mundo ta aplaudi e forma cu solo a sali pa e Pueblo di Aruba
*Reino a declara su maneho e solucion pa futuro di Aruba
*Gobierno Wever-Croes e modelo mundial di recuperacion
ORANJESTAD (AAN) — Na e momento cu el a asumi su responsabilidad como Prome Ministro, Aruba tabata tin motibo pa mira solamente nubianan scur. Awe, na e momento cu e ta prepara pa pasa e bastuta pa un proximo Gobierno, mundo ta aplaudi su logronan y su trabou pa Aruba.
Na un forma historico mr. Evelyn Wever-Croes a cambia e destino di Aruba den un sin fin di problema mundial cu a presenta.
Cu e no tabata tin miedo pa asumi e responsabilidad pa maneha un pais, cu tabata zink den problema na 2014 ora hasta e Prome Ministro di e tempo a bay sconde pa realidad, ta keda proba den e forma cu awor e por entrega un Aruba restora na su sucesor.
E logro di Gobierno Evelyn Wever-Croes no ta limita su mes na e fronteranan di Aruba pero ta visto den mundo henter mientras paisnan grandi ta lucha pa bandona problema cu nan lidernan no por soluciona den un mundo cu hasta ta papia di preparacion a un guera nobo.
Cu firmeza y sin promesa falso, mr. Evelyn Wever-Croes a asumi su responsabilidad pa dirigi Gobierno di Aruba despues di ultimo eleccion, ora ya el a entrega prueba di no ta participe den wega politico bashi pero di ta traha pa un recuperacion total pa e Arubiano.
Na final di 2024 e ta entrega herencia di su gobernacion, cu a habri porta pa aumento di pensioen di behez pa grandinan, pa oportunidadnan nobo pa hobennan y pa garantia di futuro pa e generacion cu ainda mester nace den un espacio di oportunidad cu e ta entrega hobennan di e comunidad.
Na final di 2024, tur partido na Aruba kier goberna pasobra atrobe Aruba tin placa pa traha pa su Pueblo, cu hunto cu Prome Ministro Evelyn Wever-Croes a construi un futuro solido.
Leynan nobo ta reforza moral di Aruba y ta defende interes di e Arubiano cu ta tene duro na e base moral hancra den un Aruba Dushi Tera pa tur cu ta respeta ley y ta uni asina den e base di respet pa un pais.
Pa prome biaha den historia di Aruba, Reino cu a base di Statuut mester vigila e bienestar di tur Arubiano, a duna stemadvies na prolongacion di gobernacion Evelyn Wever-Croes, cu a deshaci di e verguensa cu tabata cubri Aruba den e forma cu Reino tabata opina di e capacidad di Aruba pa goberna su mes a base di loke Evelyn Wever-Croes a hereda.
Awe nos ta uni na e aplauso di mundo pa proclama Evelyn Wever-Croes como e persona, e lider di 2024, di Aruba y ta expresa gratitud y reconocemento pa e gran trabou cu el a realiza pa awe sigura e pan di cada dia di e Arubano y e bienestar di henter e pais!
Historia di Aruba na 2024 ta resumi den e aplauso cu ta resona pa Aruba na nivel internacional y hunto cu mundo nos ta proclama mr. Evelyn Wever-Croes como e persona di 2024 di Aruba!
