ORANJESTAD (AAN): E prome Minister President di Aruba, mr. Henny Eman (76) ta den un situacion critico pero stabiel den Hospital.
E a worde interna riba aña nobo cu urgencia y diahuebs durante di tabata dialisa – cu e a inicia recientemente – y a haya un complicacion cu su curason cu a pone den estado critico.
Famia Eman a wordo yama na hospital den urgencia pa reuni cu mediconan. Ruman mas chikito, mr. Mike Eman, tabata bishitando cas di nos grandinan cu serenata pa aña nobo ora e a worde yama cu urgencia pa hospital pa e situacion critico di Henny, kende ultimo añanan ta sufriendo cu un serie di reto cu su salud.
Mr. Mike Eman a informa prensa cu su ruman ta hopi fragil, pero stabiel na e momentonan aki. “Su condicion ta hopi delicado y e proceso di dialyse ta pone un peso mas grandi riba su curpa. Nos ta pidi nos pueblo pa tene den oracion y cu nos Creador dun'e forsa pa e supera e crisis aki”.
Desde algun aña Henny Eman e confronta un varios contratiempo cu su salud. E situacion a empeora hustamente riba aña nobo cu e mester a worde interna cu urgencia na Hospital. Su señora, yiunan, rumannan y sobrinononan a bin hunto na Horacio Oduber Hospital. Famia Eman ta keda positivo, cu poder di Dios, Henny lo por recupera for di e crisis aki tambe.
