Magaly Franken a bira prome Presidente femenino di Aruba Lions Club

ORANJESTAD (AAN): Recientemente Aruba Lions Club a celebra su instalacion di directiva nobo pa aña Leonistico 2021-2022.

            Aruba Lions Club ta marca historia cu su prome Lion femenino como Presidente den persona di Lion Magaly Franken.

            E aña 2021-2022 ta bira un aña inolvidabel pa Aruba Lions Club y specialmente pa Lion Magaly Franken.

            Lion Magaly Franken ta e prome dama cu a drenta Aruba Lions Club na aña 2015. Esaki ta danki na e pensamento inovativo di miembronan den Aruba Lions Club cu na e momentonan ey tabata consisti di solamente miembro masculino.

            E anochi di instalacion a tuma lugar na Marriott Grand Ballroom y tabata e prome evento publico pa emiembronan despues di medidanan di COVID-19. Durante e anochi ameno aki, e presidente saliente

Lion Francis Leo a duna palabra di danki, a gradici tur esnan presente y a dispidi di e miembronan di

directiva saliente di 2020-2021. Lion Francis Leo a duna palabra di inspiracion pa tur compañero y a pidi

pa sigui cu e bon trabou pa e comunidad di Aruba. A recorda tambe tur e trabounan cu a logra durante e

momentonan dificil di pandemia.

            Durante e anochi a duna reconocemento na diferente miembronan, entre otro, e directiva saliente di 2020- 2021, Lion Edith “Dietje” Maduro cu a wordo nombra como ‘Rookie of The Year’ y Lion Clarice Bufalini-Ras cu a wordo nombra como ‘Lion of The Year’. Lion Clarice Bufalini-Ras ta e Leo Advisor y a coordina e proyecto di partimento di comestibles. E proyecto aki a yuda mas cu 600 famia den necesidad durante momentonan dificil di e pandemia. A duna reconocemento na e voluntarionan y nan a ricibi e ‘Friends of Lions appreciation award’.

            Lion Bibi Arends a ricibi e ‘Melvin Jones Fellow Award’ pa su tur su trabounan y logronan durante e ultimo aña nan aki como miembro di Aruba Lions Club. Lion Maximiliano “Bibi” Arends ta encarga cu e maneho di proyecto di cama di hospital y rolstoel pa e comunidad di Aruba. Por ultimo a duna un reconocemento special na Sra. Sharline Koolman. Sra. Koolman conhuntamente cu su team di DVG a sa di hunga un rol importante den e combatimento di COVID-19.

            E directiva nobo pa aña Leonistico 2021-2022 ta consisti di: Sra. Magaly Franken – Presidente, Sr. Roccini Anthony – Vice Presidente, Sra. Emlyn Thiel – Secretaria – Sra. Magaly Dijkhoff-Arends – Tesorera, Sr. Kenneth Bikker – Director 2 years – Sr. Igor Croes – Director 1 year – Sra. Edith “Dietje” Maduro – Lion Tamer, Sra. Clarice Bufalini-Ras – Leo Advisor y Sr. Maximiliano “Bibi” Arends – Membership Director.

            Por ultimo miembronan di Aruba Lions Club a yama bon bini na miembro, Ricky Vijsma, cu a regresa como Lions despues di un tempo inactivo y a ricibi su kit di miembresia di Lion Francis Leo.

E instalacion a ser clausura den forma di un brindis cu champagne unda e directiva nobo a brinda y a

wordo felicita pa e otro miembronan di Aruba Lions Club. A termina cu e tema di president nobo di LCIF, Lion Douglas X. Alexander, cu ta “Service from the heart” y ta haci un yamada na tur Lion pa sigui duna servicio for di nos curason.