ORANJESTAD (AAN)- Diamars mainta den careda di 9’or N.V. ELMAR a hay’e confronta cu un interupcion di coriente debi na un corto circuito riba un transformer den e area di Ponton.
Areanan afecta tabata, Oranjestad (un parti), gran parti di Ponton, Tanki Leendert, Jaburibari, Paradera, Moko (un parti).
Mesora tecniconan a mobilisa pa investiga y haci trabaonan necesario pa reanuda suministro di coriente. E problema a wordo resolvi y dentro di mei ora coriente a wordo suministra bek na tur areanan afecta.
Pasando den problema desde black-out: N.V. ELMAR ta experenciando algun problema den su grid di distribucion desde e blackout di diasabra ultimo 3 juli. Pa por a suministra coriente na tur su clientenan, N.V. ELMAR a pone extra cliente riba su kabelnan di 12000 volt. Consecuentemente na momento di un storing den e grid di distribucion, mas cliente ta wordo afecta cu normal.
N.V. ELMAR ta den proceso di coregi e problemanan cu a surgi den e grid di distribucion pa asina pone e grid bek den su estado normal mas liher cu ta posibel.
