Diasabra 18 di Mei awo MANA ta celebra Dia Internacional di Museo
ORANJESTAD (AAN) Diasabra 18 di Mei awo, ta Dia Internacional di Museo y pa e aña International Council of Museums (ICOM) a stipula cu e tema ta bay ta “Investigacion y Educacion”, cu ta e dos metanan mas importante den e mision di Museo Arkeologico tambe .
Asina Marguerita Wever, Hefe di Departamento di Educacion y Investigacion di MANA, a indica den entrevista cu DIARIO.
“Nos a dicidi hunto cu otro museonan pa habri pa publico. Museo Arkeologico lo ta habri di 8’ or di mainta pa 12’or di merdia y nos lo tin diferente actividad, tur cu tin di haber cu educacion y investigacion. Pa 12’or y mey nos lo lanza nos website nobo na nomber di “National Archeological Museum Aruba” y e website aki tin como meta pa duna informacion y educa, y tur informacion cu e ta contene ta basa riba investigacion”, Marguerita a señala.
El a agrega cu MANA lo haci esaki na un manera un tiki festivo, den su auditorio. Den e mesun auditorio, pa 12.30 ‘or merdia, su colega Raymundo Dijkhoff lo duna un presentacion masha interesante mes, cu yama “Oruma, Playa, un perspectiva Arkeologico”. Marguerita a comenta cu esaki ta un tema masha actual, na e momentonan aki.
E dama a añadi cu e dia aki tambe lo tin actividad pa muchanan, pa si acaso mayornan kier bin cu nan yiunan nan por sinta scucha trankil e charla, mientras cu e muchanan ta deleita nan mes cu obra di man, etc.
Ademas, un hobencita hopi dinamico di apenas 11 aña, Dea Thijsen, lo duna un tayer di trabao, na un prijs simbolico, y cu ta interesante pa grandi y chikito.
“Como cu nos tin e charla na ora di lunch, nos ta bay ofrece cumindanan chikito crioyo, manera sopi di cabrito, johnnycake cu keshi y bacalao, lo tin bolo cu coffie, juice y mucho mas”, Marguerita a duna di conoce.
Grandi y chikito ta keda invita pa bin den famia, pa pasa un dushi rato na Museo y tambe pa pasa na e otro museonan cu lo habri tambe.
