Den cuatro dia Marina Hulandes a intercepta 1 ton di cocaina

Den Lama Caribe

ORANJESTAD (AAN): E barco Zr.Ms. Groningen riba tanto Diaranson 24 di April, como tambe Diadomingo 28 di April cu a pasa, a logra di intercepta dos transporte ilegal di droga riba Lama Caribe.

   E transportenan aki tabata abordo di speedboat tipo ‘Go-Fast’.  Ta un avion patruyero Mericano bulando riba Caribe, a detecta ambos boto ta moviendo cu velocidad halto riba Lama Caribe.  Mesora a manda detaye di esaki na e barconan di mas cerca, y esaki a resulta di ta Zr.Ms. Groningen.  Capitan di e barco mesora a cuminsa bira y move den nan direccion.

   Un poco despues, nan a activa nan Botonan di Intercepcion Rapido, cu a baha na awa cu abordo personal di Fleet Marine Squadron y LEDET di US Coast Guard.

   Ora cu nan a yega den cercania di e Go-Fast, e tripulantenan no a rindi mesora, pues nan a djis manda trot den bom y a trata di huy.  Te ora cu personal di Marina a los tiro di advertencia riba nan, e ora numa nan a stop y hisa man den halto.

   E otro boto cu a wordo intercepta riba Diadomingo, mesora e tripulantenan a paga nan motor y a hisa nan mannan den halto.

   En total a detene cuatro sospechoso, y a hisa tur e bultonan di droga cu tabatin abordo.  Ora cu a bay conta e paki y pisa nan, en total esaki a yega na 1.072 kilo di cocaina, y tur a wordo confisca y entrega na US Coast Guard.

   Calculo haci door di DIARIO, ta indica cu e droga aki riba caya na Merca tin un balor di 31,5 miyon Dollar.  E droga mientras tanto ya caba a wordo destrui, y e sospechosonan lo wordo hiba dilanti Corte na Merca.

   E barco Zr.Ms. Groningen ta desde comienso di April 2024 bek activo den Caribe.  E barco di Marina Hulandes ta wordo usa pa operacionnan anti-droga den cooperacion estrecho cu US Coast Guard, y Wardacosta di Caribe Hulandes.