Raymundo Dijkhoff lo ofrece un charla cu un perspectiva completamente nobo di Playa: “Oruma, Playa, un perspectiva Arkeologico”

Diasabra awo 18 di Mei na MANA:

ORANJESTAD (AAN) – Como parti di e tema “200 aña di Oranjestad, Playa”, e Arkitecto drs. Raymundo Dijkhoff lo ofrece un lectura, diasabra awo, dia 18 di Mei cu ta celebra Dia Internacional di Museo.

Raymundo a splica den entrevista cu DIARIO, cu e lectura ta titula “Oruma, Playa, un perspectiva arkeologico” unda e ta bay elabora riba kico exactamente ta loke ta bay wordo celebra: E nomber di 200 aña, Playa cu ta existi segu’e desde 300 aña caba, of e area cu a bira Playa pero cu tin mil aña di historia caba. “Cual historia nos ta bay conta. Decolonizacion? E historia di full e area aki of nos ta bay enfoca riba un parti specifico, segun e desaroyo cu tin aworaki den Caribe?” Raymundo a indica.

Raymundo a puntra si ta bay conta historia Europeo of di Aruba su antepasadonan cu a bin akinan. Pues, un parti di e historia so of full historia. El a agrega cu e ta bay mustra cu banda di loke ta conoci den documentonan historico, y tocante e material cu a haya durante cuater aña 2010 pa 2014, di Playa, cu ta conta full un diferente historia cu no ta documenta. E lo bin cu un perspectiva completamente nobo di Playa (no full Oranjestad), y lo elabora riba e palabra “Playa” y na final lo bin cu un debate, e refleho, kico ta realmente decoloniza. Kico ta e parti post colonial, kico kiermen colonialismo. Na final e ta bay laga un proposicion pa tur hende reflexiona.