Lo sigui traha te haya solucion pa e cruzada peligroso Lagoweg- Bernhardstraat

Parlamentario Alvin Molina:

ORANJESTAD (AAN) – Parlamentario Alvin Molina, di fraccion di MEP, a referi den conferencia di prensa, cu a tuma lugar na San Nicolas, banda di Carnaval Village, na e apertura di e rotonde na Palm Beach, Diabierna ultimo, unda cu e tabata presente.

Molina a expresa cu esaki sigur lo yuda den e fluho di trafico den e area aki, ademas cu e ta haci e caminda mas sigur. E parlamentario a bisa cu esaki ta un tremendo trabao di e Ministerio di Infrastructura, DOW y tur su partnernan, y pesey el a yama Aruba pabien, cu un bunita logro.

Despues, el a sigui relata tocante su presencia na Carnival Village, specificamente den e cruzada Lagoweg-Bernhard straat, cu e ta considera un cruzada sumamente peligroso.

“Si subi e cruzada aki ora bo ta biniendo di Zuid Lagoweg, no ta haci diferencia ki direccion bo kier bay. Sea bay Noord of bira bay abao, e ta gewoon un ‘gamble’ pa subi e cruzada aki” Parlamentario Molina a expresa.

E parlamentario a subraya cu riba e cruzada aki e automobilista ta riesga su bida y di otro hende, pasobra no tin ni un manera pa tin un bista riba ki trafico ta biniendo for di e parti pabao.

“Y e trafico aki, pa colmo, por y mag core relativamente duro. E ta logico tambe pasobra e ta un caminda principal hopi frecuenta. E ta un caminda cu ta cuminza te na Oranjestad bin ariba, pasa straight San Nicolas”, Alvin Molina a señala.

El a splica cu den un edificio eynan, antes tabata tin un spiel cu por a mira e trafico cu ta bin di pabao, y por a wak si por a core riba e cruzada, pero aworaki e spiel ey no ta eynan mas. “Manera mi a bisa e ora ey, un cruzada sumamente peligroso” e parlamentario a enfatiza.

El a sigui splica cu pa e motibo aki, el a entrega un mocion for di October di aña pasa caba, cu a ricibi apoyo unanime den Parlamento, pa construi un rotonde riba e cruzada aki. “Mi a ricibi contesta di DOW cu e caminda aki ta parti di Green Corridor, y ta cay bao maneho di ‘Caribbean Infrastructure Company’ (C&C). Esey kiermen cu un rotonde riba e caminda caminda aki no solamente lo trece extra gasto cune, pero mester di aprobacion di e compania na Colombia, hasta te na Merca nan mester duna aprobacion pa pone un rotonde riba e caminda aki”, Parlamentario Molina a señala.

No obstante, e tin e pregunta: “Con ami por logra esaki toch?” “Kizas tin otro manera con pa haci e cruzada aki mas safe?” El a ricibi e contesta cu un slipping police riba Bernhard straat, na haltura di e supermarket bin ariba, lo slowdown e trafico di un manera cu e ta bin di abao, di manera cu e trafico cu ta bin di Lagoweg por subi e cruzada na un forma mas sigur.

“Pero un slipping police tambe mester haya aprobacion di C&C, aunke a wordo splica na mi, cu e proceso aki ta hopi mas facil y lihe cu ora bo ta haci peticion pa un rotonde”, Molina a duna di conoce.

E parlamentario a expresa cu riba e cruzada aki, e lo sigui den contacto cu DOW, cu e bureau di e minister, duna siguimento na e mocion cu el a presenta pa e rotonde, pa e situacion hopi peligroso aki, por wordo soluciona.