Caso a bay te dilanti Huez
ORANJESTAD (AAN): Trahadornan na Arubus ultimo tempo ta keda babuca pa mira con gerencia ta sigui introduci cambio, y sorprendentemente nan ta haya e medidanan aki implementa riba nan, sin cu nan tin caminda di cana.
Esey a socede tambe recien, y ora cu e trahadornan a nota cu atrobe gerencia ta bolbe implementa cierto cambio riba nan, a core pidi nan Sindicato SEPPA pa un consulta urgencia riba loke ta pasando cerca e compania Arubano di Bus.
Debi na e urgencia cu e trahadornan a exigi, Sindicato SEPPA a reuni cu e trahadornan dilanti e edificio di Arubus mes na Sabana Blanco 67. Aki e chauffeurnan, trahadornan, y mecaniconan a sali un rato pa bay pafo, pa asina haya conseho di nan Sindicato riba e medidanan implementa riba nan.
Awor a bin sali na cla, cu gerencia di Arubus no a gusta e asunto aki mucho, y nan ta considera loke nan a haci como un ‘Accion’ of ‘Welga’, siendo e trahadornan ta bisa cu esey no ta berdad. Gerencia di Arubus ta haya cu e trahadornan no a duna nan notificacion di 72 ora di antemano, y pesey a entabla un caso sumario den Corte.
Pero e trahadornan ta insisti cu no ta trata di ningun tipo di Accion ni Welga, pero djis un suministro di informacion encuanto e medidanan cu ta wordo tuma. Y tambe e lamento cu e protocol cu Trahadornan a firma cu Gerencia pa atende tur nan asunto salarial, te ainda nada di esey a wordo cumpli.
Den e caso di protocol, ta batiendo na porta di Mediador di Gobierno, na Ministro, y tambe na Gobierno en general pa check ki dia nan lo cumpli cu e protocol ey. Y pa nan sorpresa, gerencia awor kier implementa un reglamento y un schalering di salario cu a wordo traha hunto cu un compania di accountancy.
