Diferencia grandi den prijs den dos botica na Playa:
*Y no tin control!
ORANJESTAD (AAN) – Cu un control riba diferencia di prijs den productonan, no solamente na supermercado, pero den e sector di remedi tambe, ta necesario na Aruba.
Un consumidor cu pa añanan ta uza Compleho B-12 den su forma likido, a bay su botica di semper pa busca esaki, e marca cu cual e ta custumbra cu ne y cu ta bin den un cantidad so.
Semper el a paga casi 26 florin p’e pero como cu el a keda dos luna cu no por a cumpr’e, el a pensa cu debi cu prijs di tur cos a subi, sigur e lo bay hay’e pa un 35 florin e biaha aki. Pa su sorpresa e cahera a bise cu e prijs ta 48 (y pico) florin.
E consumidor a bisa e cahera cu ta straño, pasobra semper el a cumpre pa 25 florin y algun cen mas. Como cu el a bira mucho caro, y cu su cen e momento ey no a yega e no a cumpr’e.
Toch e cliente a keda cu e duda, y a cana bay e otro botica un tiki mas pabao pero tambe den Caya, y a puntra pa e producto. E mesun B-12 complex, mesun marca, mesun boter, el a haya pa 30 florin cu 58 cen!
Kiermen di un diferencia di 18 florin entre un y otro botica pa mesun remedi! E no por yama esaki mas cu un abuso. El a yega su cas y a yama un par di botica mas di e mesun grupo cu e botica unda el a cumpra e producto, y den tur e prijs ta 30 florin y algun cen! Kiermen no tin un fout cu nan por a cobr'e menos. Pero na su botica di custumber, e prijs ta 18 florin mas caro, cu ni uzando su carchi di 10% descuento pa 60 plussers, lo no a haci diferencia.
E cliente aki ta vast, e ta cumpra tur loke ta producto den reki den su botica unda e ta cliente pa añanan y cu su nomber ta registra eynan pa su recetanan sea AZV ta cubri of e mes tin cu paga.
Di awo padilanti, otro articulonan particular e no ta cumpra eynan mas. E lo sigui bay na e di dos botica cu incluso ta mas cerca di bus, cu ta su transporte di tur dia.
