Lo converti e area di Rodger’s Beach den un atraccion unico pa local y turistanan

Minister Dangui Oduber ta anuncia:

*Entre otro lo traha dos 'footpad': un di concreto y otro di palo 

ORANJESTAD (AAN) – Minister Dangui Oduber, den conferencia di prensa na Rodger’s Beach mes, a detaya di kico e Master Plan pa area aki ta encera. E ta bay bira un proyecto hopi bunita, unda lo wordo construi un foot pad di concreto, cuminzando for di e skina na ex-Esso Club, cu ta bay conecta e parkinglot di Baby Beach cu e area aki y na final di Rodger’s Beach ta bay traha un 'footpad' di palo, cu ta bay wordo conecta cu e trapi di mosaic cu ya caba a wordo drecha, locual sigur lo bira un atraccion turistico y tambe lo bay amplia e beach di Rodgers Beach.

             “Aya banda nos ta bay move un tiki e caminda pa asina local y turistanan tin un tiki mas espacio na e beach. Banda di esaki lo percura pa traha un parkinglot completamente nobo, pa mehora e infrastructura pa tambe drecha e palapanan existente, y pone nobo extra, pa asina mas hende local y turistanan haci uso di Rodgers Beach.

            Naturalmente nos ta bay percura pa landscaping, embeyece henter e area aki, cu sigur lo haya e atencion necesario cu no a haya durante e ultimo decada. Tambe nos lo mester pa pone bañonan modular conhuntamente cu ATA, pa asina tur esnan cu ta haci uso di e beach aki, tin tur e facilidadnan necesario. Y e hut caminda nos ta para akinan, tambe lo wordo renova y drecha, den uno sumamente bunita, di calidad pa tur hende haci uso di dje, manera a wordo haci e ultimo añanan. Esaki no ta den e miho estado y e ultimo añanan aki e no a haya e atencion cu e tabata merece”, Minister Dangui Oduber a subraya.

            E mandatario a expresa cu for di momento cu el a drenta gobierno na 2017, ya caba a cuminza traha riba plannan pa mehora e infrastructura di Seroe Colorado, pero lamentablemente gobierno mester a maneha e pandemia pa dos aña cu a crea un stancamento di dos aña cu no por a ehecuta ningun di e proyectonan cu tabata tin pensa y planea pa e area di Baby y Rodger’s Beach.

            “Pero nos ta contento cu despues di e pandemia nos a pick up e Master Plan y nos ta cla pa ehecuta esaki. Como Gobierno nos tin un rol hopi importante pa stimula nos economia, percura pa tin desaroyo, y sigur nos como ministerio di turismo kier fungi como un ‘trend setter’ pa haci inversionnan necesario pa sector priva tambe por sigui cu inversionnan pa nos por drecha henter e area di Seroe Colorado. Nos a bin ta demostrando esaki pa algun aña caba; ta hopi miyon florin nos ta invirtiendo den e area di Seroe Colorado, pa asina nos por ehecuta y cumpli cu e Master Plan cu nos a anuncia pa e area aki. Y awe nos ta mira con poco, poco, e plan aki ta cristalizando”, Minister Oduber a remarca.