Enid de Kort, Terapista di pareha
ORANJESTAD (AAN): Enid de Kort, Terapista di pareha na Departamento di Asuntonan Social a indica durante un entrevista cu DIARIO cu pa hopi aña caba e ta bisando cu na Aruba tin un problema serio di pareha den sociedad.
Si ta mira e cifranan, a bisa, tur aña Aruba ta den e 'top 3', di e casonan cu ta wordo haya pa terapia. Tur dia por wak riba social media cu tin casonan caminda tin violencia. Pesey e ta bisa cu e problema aki ta hopi serio y tin hopi trabao pa haci na Aruba y dia pa dia ta birando mas, a expresa.
De Kort a splica cu tin hopi factor cu ta conduci na esaki. Ta parce cu stress ta aparece mas y mas den famia. Por ta stress financiero, por ta intimidad, pero por ta tambe cu hendenan no sa con pa anda cu nan emocionnan.
Hopi biaha ta haci uzo di violencia, pero banda di esaki tin hopi trauma cu no a supera y cu hopi biaha ta 'trigger'. "Por ta no ta e pareha ta e 'issue', pero pareha ta bisa algo y e ta trigger un violencia cu bo no por imagina", a bisa.
Tambe por a ripara personanan cu nan empatia ta bayendo perdi. Hopi cos ta bira "ami' y no ta wak cu kico 'ami ta contribui den un relacion". Hopi ta kere cu e otro ta e problema, ami no.
No por laga afo cu tin hende cu ta haci mal uzo di substancia of alcohol. Mester agrega uzo di medionan social den e sentido cu e tin un impacto. "Mi ta haya den terapia, por ehempel, personanan cu ta sinti insigur pasobra tin flirtmento, mandamento di emojis. Akinan ta puntra cual ta e limite, y kico no ta sano pa un relacion y esey pa respet mester bay defini'e.
Tin hopi factor den sociedad cu ta un acumulacion di hopi problema, Enid de Kort a duna di conoce.
Tin casonan caminda por tende cu tabata ponemento di pistol na cabes, cortamento, cu ta birando serio. Parce cu mas y mas a cuminsa uza armanan pa purba resolve un conflicto, a subraya.
