Minister Dangui Oduber hopi satisfecho:
ORANJESTAD (AAN)-- E conferencia di prensa di Gobierno, Dialuna mainta, a tuma lugar na aire liber na Rodgers Beach, den cual Minister Dangui Oduber, titular di Salud y Turismo, a hiba palabra pa anuncia e proyecto di embeyecimento y mehoracion di Rodgers Beach.
E mandatario a bisa cu esaki ta un bunita proyecto di upgrading y embeyecimento di e area di Seroe Colorado, conforme e Master Plan cu ya caba a keda anuncia algun aña pasa, y e tabata consisti di 'upgrading', embeyecimento y mehoracion cuminzando den e area di Baby Beach. Pa algun tempo caba e tabata den ehecucion y fase uno ya a wordo entrega.
Oduber a indica cu na e momentonan aki nan ta ehecutando y finalizando e di dos fase cu ta consisti di organiza un bon parkinglot, structur’e, bin cu iluminacion, landscaping, y awo ta preparando caba e siguiente fase cu lo bira construccion di e kiosconan y unda ta bay renova e tenis court. Ta bay bin canchanan deportivo, di cual dos ta bira tenis court y dos ta bira cancha multifuncional unda por haci diferente deporte y meymey ta bin un restaurant
completamente nobo, pa asina por cubri tambe e necesidad di hopi turista.
E dignatario a informa cu ya caba e bestek pa e fase 3 a wordo prepara pa anuncia e proyecto aki cu ta bay cuminza cu destaho publico, pa despues e trabao tuma lugar, y asina tambe finaliza e Master Plan, pa loke ta trata Baby Beach.
“Y awe mi ta contento cu nos ta para na Rodgers Beach, caminda nos ta anunciando cu pa e area aki tambe nos ta dunando e atencion necesario pa haci inversionnan den mehoracion di e infrastructura.
“ Nos ta kere den San Nicolas! Nos a demostra esaki no solamente cu plannan pero cu accionnan concreto di busca e fondonan, haci e inversion nan necesario y tur hende por ta testigo di con e proyecto di Baby Beach ta wordo ehecuta na e momentonan aki. Y nos ta contento di por a anuncia cu e proyecto di Rodgers Beach tambe ta bay cuminza den algun siman, despues cu e bestek keda cla y cu destaho publico cuminza” Minister Dangui Oduber a reitera. Por lesa den otro articulo kico ta e plan pa Rodgers Beach.
