Lo cera entrada pabao di casnan di pueblo na Gielstraat pa stop habitantenan di tira desperdicio

BCI a drenta den accion, segun Robby Rosel:

*Ya caba nan a traha un dump ilegal 

ORANJESTAD (AAN) — Relacionista Publico di Bureau City Inspector (BCI) Robby Rosel, den entrevista cu DIARIO a referi na e caso di e habitantenan di Gielstraat, of Casnan di Pueblo di Noord, unda a bin topa cu un dump ilegal y cu mesora a pone BCI drenta den accion.

Rosel ta corda cu na aña 2018 Bureau City Inspector a haci e prome  limpieza general na Gielstraat, unda esaki tabata completamente un mondi-dump caminda cu e habitantenan mes tabata tira e desperdicionan na parti pabao di nan cas.

“Asina nos ta bisa cu aña tras aña ora bo caba di haci esaki limpi, nan ta bolbe tira desperdicio eyden bek. Biniendo riba caso di e aña aki, nos a dicidi di bolbe hacie limpi, pero e ta suficiente. A yega momento cu mester cera e entradanan pa desperdicionan no wordo tira mas, pa mantene e lugar limpi”, Rusel a duna di conoce.

El a agrega cu e noticia aki no cay den bon tera pa e habitantenan di e casnan di pueblo aki, y nan ta e mesun personanan cu ta tira e sushi aki. Nan no a gusta, a protesta y ban na medionan pa trece dilanti, nan mal contento.

“Pero mi mester bisa cu nos a confronta ey dilanti cu sushedad, frishider, stof, set cu a wordo tira manera ta un dump e ta. Esaki ta tereno di gobierno destina pa FCCA traha mas cas di pueblo. Pero te na e momentonan aki no a wordo haci nada riba esey, y nos por bisa cu te aworaki, berdad nos a pone piedra, pero e habitantenan mes a dicidi di hala e  piedra, pa nan por drenta na e parti paden, manera nan a splica cu esey ta e unico manera cu nan tin pa yega nan cas. Pero nan por para dilanti nan cas. Auto por para dilanti nan cas, pero BCI hunto cu DOW y tambe DIP, nan ta bezig ta wak kico por haci pa habri un entrada dilanti pa nan”, Vocero di BCI, Robby Rosel a indica.