Elmar tabata ignora nan suplica pa reunion
- Asociacion AGDA splicando encuanto nan decision abrupto
- Apesar di contratiempo a sigui yuda comunidad tur e añanan ey
ORANJESTAD (AAN): Siman a habri cu Asociacion di Gasolin Dealers di Aruba (“AGDA”) a acerca DIARIO pa asina clarifica na comunidad di Aruba e decision unanime, pero lamentabel cu AGDA a haya su mes ta tuma dia 1 di Februari 2024. Nan a splica cu e no tabata un decision facil pero uno necesario.
Bayendo den historia, desde Augustus 2012 miembronan di AGDA a bin ta coopera cu NV Elmar pa asina yuda Elmar pa brinda coriente Pre-Paga na e comunidad di Aruba. Esaki inicialmente den forma di un programa piloto, despues a bay over na un acuerdo cu Elmar caminda cu miembronan di AGDA lo a bira partner exclusivo di Elmar den benta di nan coriente Pre-Paga.
Ta di menciona cu Elmar su unico costo pa e bendemento di coriente Pre-Paga tabata nan programa y training, e station nan mes mester a cumpra un extra laptop y printer y suministra su mes cu papel tambe como recibo pa e cliente nan di Elmar. Pues tur Gasoline Station lo a bende e producto di Elmar na comunidad, ricibiendo un comision dependiendo di volumen di benta.
Desde 2017 pa awor e gasto nan pa yuda Elmar cu e benta di coriente Pre-Paga ta sigui subi sin cu Elmar ta tuma nota di esaki, apesar cu AGDA a continuamente acerca Elmar pa discuti esaki. Elmar continuamente ta ahusta su prijsnan a base di cu prijs di crudo ta subi of algo otro. AGDA su miembro nan no tin e luho ey paso ta gobierno ta dicta nos margen di ganashi.
Un ehempel di e subida di costo pa por brinda e servicio di bende coriente Pre-Paga ta cu salario di trahador a subi, coriente a subi y gastonan bancario a subi drasticamente pa nos miembronan (y tur otro comerciante na Aruba) ora pago worde haci via carchi.
Un ehemplo: Pa por splica e situacion cu nan ta confrontando actualmente, nan a ofrece un ehempel pa aclaria.
Si un cliente cumpra 100 Florin di coriente na un stacion, e swipe esaki cu e carchinan nobo (Mastercard), esaki ta conduci na un gasto inmediato pa e stacion di entre 2.7% pa 3.99% (depende di e banco) cu banco ta kita for di e station. For di e cliente su cuenta banco ta kita e suma di 100 Florin, pero e suma cu nos miembro ta ricibi riba su cuenta di banco ta 96.01 Florin, pues aki ta surgi e promer perdida pa e station di 3.99 Florin riba cada 100 Florin di coriente.
Pero e Gasoline Station si mester paga Elmar 100 Florin, aki ta surgi e di dos perdida pa e station di 3.99 Florin, sin conta e gasto pa e transfer e placa aki pa Elmar. Elmar ta paga e stacion 3 Florin of 2.50 Florin na comision y esey ta haci cu e station su perdida ta un poco menos, pero ta keda un perdida di 4.98 Florin pa cada 100 Florin di coriente Pre-Paga haci. Dus no solamente nos miembronan mester bende e producto di Elmar, pero tambe mester financia Elmar su operacion di benta na Elmar su clientenan.
Asina mes, despues di asina tanto contratiempo, e miembronan a keda coopera cu Elmar, pa e comunidad di Aruba. Pa asina facilita e benta na Aruba y comunidad por a cumpra coriente Pre-Paga cerca nos miembronan. Pero cu e realidad di e gastonan bancario y otro gastonan cu nos miembronan ta enfrentando, lamentablemente esaki pa hopi tempo caba no ta posibel mas.
Comunicacion cu Elmar: Pa hopi aña AGDA ta purba convence Elmar di e situacion dificil di nos miembronan cu benta di e coriente Pre-Paga, pero e unico interes di Elmar semper tabata di su mes. Na September 2022 AGDA a sinta pa ultimo bes cu Elmar pa purba ahusta e acuerdo cu a termina na 2018. Den e encuentro aki cu directiva di Elmar, despues di a reitera cu nos miembro nan no por keda bende coriente Pre-Paga cu perdida, nos a worde bisa, sin ningun emocion, cu Elmar ta perdiendo placa cu nos acuerdo y cu nan lo ta buscando un alternativa pa elimina e bendemento na e station nan. Esaki ta e manera cu nos compania Estatal di Coriente ta trata su partner den e benta di coriente Pre-Paga di mas di 10 aña?
Asina mes despues di e reunion aki a purba na VARIOS ocasion di yega back na mesa via e-mail, carta, etc. tur intento a keda sin ningun reaccion di parti di Elmar.
Por fin ta tin señal di bida di parti di Elmar ora cu dia 31 di januari 2024, despues di 4’or di atardi, Elmar ta manda AGDA un carta avisando cu desde e dia siguiente, esta 1 di Februari 2024, coriente Pre-Paga lo por worde bendi na comunidad di Aruba pa medio di Pay.aw di SETAR y cu AWOR nan kier AGDA bin sinta na mesa cu Elmar.
Segun AGDA, esaki ta un falta di respet, un insulto pa e miembronan y e directiva cu tabata un partner di mas cu un decada di Elmar. Un sentimento cu cualkier persona den nos zapato lo por comprende ora di worde trata asina aki. Asina mes AGDA su miembronan a sigui bende coriente Pre-Paga dia 1 di Februari 2024. E mesun atardi di dia 1 di Februari 2024, den un reunion di urgencia nos miembrecia den su totalidad a dicidi cu te aki nos a yega, awa a pasa hariña y nos no por sigui bende Elmar su producto na un perdida mientras cu e trato ricibi di Elmar ta indicacion cu nan no tin aprecio ni respet pa nos. Nos organization y su miembro nan ta keda profesional y como tal semper lo nos ta habri pa negosha cu un y tur, inclusivamente cu Elmar, pero pa awor aki e decision ta keda firme.
AGDA a finalisa bisando: “Na nos clientenan nos ta pidi nos disculpa pa e inconveniencia cu nos decision tuma y danki pa e comprension.”
