ORANJESTAD (AAN): Siguientemente, DIARIO ta trece dilanti e discurso di Prome Minister Evelyn Wever-Croes pa loke ta ciere di 2023 y inicio di 2024.
Esaki ta wordo trece den tres parti, pesey keda pendiente di e continuacion den dos articulo apart.
"Digno Pueblo di Aruba, apreciable conciudadanonan
Nos ta clausura un aña remarcabel, 2023, cu nos a denomina “Aña di Union y Positivismo”. Ta un honor y un privilegio pa mi dirigi algun palabra na boso den nomber di Gobierno di Aruba, como boso Prome Minister.
Mi tin un sentimento profundo di gratitud na prome luga pa e confiansa cu cada un di boso a pone den mi y den nos Gobierno pa a atende e desafionan cu nos pais a enfrenta y ta enfrentando tanto local, na cas, y tambe den Reino.
Na comienso di aña mi a menciona cu aña 2023 lo ta un aña cu lo inclui hopi cambio y sacrificio cu hunto nos lo tin cu carga. Pasobra mi tabata sa cu ta asina so nos por carga e peso di compromisonan financiero cu Aruba a keda cu ne despues di e pandemia, y e debenan di prome cu pandemia. Nos a enfrenta obstaculonan cu a pone nos pasenshi y resistencia na prueba. Sinembargo, ta e momentonan aki ta demostra berdaderamente e spiritu di union y determinacion cu ta inculca fuertemente den cada Arubiano.
P’esey prome cu mi haci cualkier mencion di logronan financiero of economico di e aña aki, mi kier para keto na e prome logro: esey ta cu nos a para hunto, uni cu positivismo den un solo meta; e meta pa supera e dificultadnan hunto, pa maňan ta miho cu awe, y pa hiba nos pais padilanti.
Y ni cuanto forsanan negativo, cu interes aheno, de bes en cuando a purba distrai of destabilisa nos pais, nos a supera nan tambe.
Nos a logra pasobra e forsa cu ta guia nos desicionnan, ta e virtudnan di integridad cu nos Creador a crea nos cu ne den nos curason y mente, pa nos mira cu claridad y sinceridad, pa actua cu curashi y fe na bienestar, no solamente di nos mes, y esnan cerca di nos, pero na bienestar di henter nos comunidad".
