Lo bay start un campaña pa educa pueblo pa prepara pa Horcan

ORANJESTAD (AAN): Temporada di Horcan a cuminza, y tin varios persona ta opina cu pueblo no ta suficiente prepara pa esaki.

   Siman pasa oficialmente e Temporada di Horcan 2021 a cuminza, sinembargo ya desde 15 di Mei a cuminza pone un ‘watch’ pa e temporada.

   Rino Hermans di Rampenbureau Aruba, a indica cu riba e isla aki, ta varios plan a wordo traha pa 2021.  Segun Hermans, e.o. tin plan kedando cla pa scolnan, y tambe diferente departamento di Gobierno.

   Pa educa pueblo riba tur esaki, dos campaña ta bay cuminza pronto pa concientiza pueblo riba e asunto di Horcan.

   Segun Hermans, esaki ta bin debi cu e aña aki ta pronostica uno abnormal, cu entre 16 pa 20 sistema di tormenta, di cual 9 lo bira Horcan, y cinco di nan lo bira fuerte di categoria 3 of mas.

   Aña pasa tambe tabatin 30 sistema tropical cu no a afecta e isla, pasobra ta 3 so a pasa cerca di Aruba.  E speranza tey cu e lo keda asina pa 2021 tambe y lo keda pafo di e region.

   Tambe ta bay reorganiza un training pa asina mira si tur hende ta riba nivel aceptable, y prepara pa deal si acaso Aruba wordo afecta pa tormenta.