ORANJESTAD (AAN) – Den e conferencia di prensa di gobierno di dialuna, pa duna un update di Covid-19 den e contexto di medidanan suaviza, Sharline Koolman di Departamento di Salud (DVG), a hiba palabra.
Koolman a menciona cu lo suaviza e medidanan, y e ta spera cu tur hende compronde como “suaviza” cu e control lo ta menos, pero no a pidi ainda pa e comportacion di nos tur, bay hunto cu esaki.
Esaki ta nifica cu cada ciudadano mester tene su mes na e medidanan higienico, pa evita un situacion desagradable cu nos por haya nos mes aden, Koolman a indica.
MANEHO DI CUARENTENA:
Tocante e maneho di cuarentena cu Prome Minister a anuncia, Koolman a agrega cu e protocol enberdad a wordo suaviza pa esnan cu ta vacuna y a haya tur dos dosis, y tin mas cu dos siman cu a vacuna.
Ora e persona ta wordo yama for di Salubridad Publico y wordo puntra si e ta vacuna y a haya tur dos dosis y cuanto tempo pasa, nan ta puntra e fecha y controla esaki den e sistema pa confirma esaki. A base di esey, DVG ta haci un afspraak cu e persona cu despues di cinco of diez dia lo yama bek, y si e persona a haya sintoma tur e proceso di test, isolacion p’e, ta cuminza di nobo.
Koolman a subraya cu DVG sa cu e casonan aki ta hopi menos y mucho menos severo tambe.
Tin caminda unda ta bisa cu e vacuna ta cubri mas of menos 95% pues tin un chens cu si e persona tin mas di dos siman di a haya e di dos dosis por haya Covid-19 pero cu sintomanan leve, hopi minimal.
Pa esnan cu no ta vacuna y/of no tin mas cu dos siman vacuna, of cu tin un vacuna so, esaki no ta aplicable. E personanan aki ta bay segun e maneho di cuarentena, e mester ta na cas, no por traha, no por bay scol, etc.
Koolman a agrega cu tanten cu Aruba no tin ok ainda pa cuminza vacuna esnan bao 18 aña, tampoco e ta aplicable.
