Limpieza di tereno di APA ta cuminza pa traha acomodacion pa e mega cruseronan

ORANJESTAD (AAN) – Diahuebs mainta a tuma lugar un conferencia di prensa yama pa Minister di Turismo y Salud, señor Dangui Oduber. E rueda di prensa aki a tuma lugar riba e tereno di Aruba Ports Authority,

na unda lo bin e desaroyo di Port City. Director di APA mr. Marc Figaroa, tambe tabata presente y a hiba palabra.

Minister Dangui Oduber a bisa cu pa prome biaha den historia, APA a traha ribaun master plan  cu un vision hopi cla tocante unda nan ta y unda nan kier bay, den e futuro hopi cercano: “APA a presenta diferente desaroyo hopi interesante, pa asina stimula e economia, crea entrada pa APA y pa gobierno y tambe cuponan di trabao.

“E tereno unda nos ta para mes ta un tereno cu tin hopi potencial pa un futuro desaroyo. E motibo pa cual nos ta para akinan awe, ta pa anuncia un proyecto cu sigur ta cuadra cu e vision y maneho cu gobierno kier hiba”, Oduber a bisa.

El a reitera cu e aña 2022 aki, a wordo decreta pa Gobierno como un aña di inversion y oportunidad. “Den cuadro di esaki, pa a e ultimo dos añanan APA a hiba combersacionnan cu diferente linea di crusero pa percura cu e canalnan aki, caminda nos ta para, ta apto pa nos por acomoda e mega cruseronan. Y den e combersacionnan e intencion ta, desde dos aña pasa caba, pa percura pa haci un limpieza total den e canalnan”, Minister di turismo a indica.

El a agrega cu pa motibo di e pandemia e dos ultimo añanan aki e proyecto no por a concretiza. “E no a wordo haci pa motibonan financiero. APA tabata tin hopi reto cune, y esey ta e motibo pa cual e trabaonan no por a continua. Pero nos ta contento cu e siman aki, oficialmente, e trabaonan a cuminza pa haci un limpieza total, pa di e forma aki crea e oportunidad y espacio pa acomoda e mega cruseronan. Den e caso aki di ‘Oasis Class di Royal Caribbean Cruise Lines’, nos a haci un inversion di 1.6 miyon florin, cu ta bay crea oportunidadnan pa e mega cruseronan trece miles di turista cu, obviamente, ta bay yuda taxista, tour operators, y e centro di ciudad.  E ta crea un ‘spin up’ (auge) economico ora di atrae e mega cruseronan aki” e mandatario a splica, reiterando cu esaki ta conforme e proyeccion cu gobierno a haci cu 2022 ta bira un aña di inversion.

Segun e dignatario, Gobierno ta convenci cu lo haya un “return of investment”, pasobra APA tambe ta bay genera entrada door di e inversion aki.  “Aña 2021 tabata un aña di hopi reto pa Aruba Ports Authority y te na Juli 2021, APA a habri e cruseronan bek y aña a cera cu un recuperacion di apenas 16%, den comparacion cu aña 2019 cu tabata un di e miho añanan pa APA, unda a yega na casi 830 mil turista” e minister a resalta y a agrega cu gobierno tin un perspectiva hopi mas optimista y positivo, unda nan ta proyectando un recuperacion di turismo crusero, di casi 60%.

No obstante cu e variante omicron a afecta e luna di Januari, gobierno ta keda positivo, cu tur e reservacionnan cu tin pa aña 2022, lo por recupera 60% en comparacion cu aña 2019.