Grupo di ciclista a wordo ataca pa varios cacho

ORANJESTAD (AAN): Un biaha mas cachonan di personanan iresponsable a causa un incidente serio riba caya.

Problematica di cachonan riba caya ainda ta un peliger pa personanan cu ta cana of haci otro tipo di deporte y sigur mester tuma medidanan mas concreto contra esaki. Pero cachonan cu si tin doño y no ta haci nada pa evita cu nan ta ataca cualkier persona cu por ta canando of coriendo bicicleta den cercania ta un otro storia.

Un grupo di ciclista cu tabata practica nan deporte den area di Donkey Sanctuary, a splica DIARIO, cu tres cacho a sali for di un cura, a cuminsa blaf y diripiente a ataca nan. Un di e damanan a perde balans y pa suerte, na ultimo momento el a bira su cabes pa e no haya un golpi na su cara, pero a dal tras di su horea na e cácho di stuur di e bicicleta di otro ciclista. Esaki a causa un herida grandi, cu a cuminsa sangra hopi. E dama mester a haya cinco stichi parti patras di su horea robes. E ciclistanan a haya varios otro rasca y heridanan den diferente parti di nan curpa.

E ciclistanan a conta cu semper ta e mesun cachonan cu ta ataca ciclistanan cu ta core eybanda. No ta prome biaha e grupo aki a keha y nan a indica cu tampoco nan ta e prome pa keha. Nan ta hopi rabia pasobra e doñonan di cachonan NO ta cera nan na un manera responsable y segun ley. Loke ta pio, e doñonan di e cachonan aki tambe ta ciclista, kiermen nan sa e peliger di un atake di cacho.

E ciclistanan a fada y a dicidi cu awo ta ora pa denuncia y actua. Aunke e doñonan di e cachonan a asumi nan responsabilidad di paga pa e dañonan, nan mester haci algo urgente prome cu algo pio pasa. Nan ta urgi tur doño di cacho pa cera nan den cura y si no tin cura, mester mara nan na un manera safe pa e cachonan of tene nan paden di cas.