ORANJESTAD (AAN): Diahuebs atardi, Director di Setar NV, Roland Croes acompaña cu e ehecutivo Ronica Croes
a realisa un conferencia di prensa unda a indica cu e pandemia aki di COVID-19 a mustra con importante e acceso na Internet ta y e importancia pa ta conecta na tur momento.
Setar durante e periodo aki a bin cu varios iniciativa pa haci les online posibel door di haci donacion di Mifi y carchinan di prepaid pa studiantenan cu no tin acceso di Internet na cas como tambe donacion di tablets pa studiantenan cu no tin device. E siguiente meta di Setar ta pa haci e futuro resiliente pa e infrastructura y servicionan di e scolnan. Cu e aumento drastico di enseñansa digital, e scolnan tin necesidad pa mas data y stabilidad. Esaki ta wordo haci posibel door di instala fiber na tur scol na Aruba.
Actualmente Setar tin varios scol na Aruba conecta caba riba fiber. E trabou a cuminsa cu scolnan secundario pa despues sigui pa scolnan basico. Cu e migracion aki pa fiber, Setar por garantisa un bon speed di Internet pa e scolnan pa por sigui crece y expande nan curriculum pa futuro. Di e manera aki Setar, como compania nacional di telecomunicacion, ta coopera pa e scolnan por bay na e siguiente nivel y asina garantisa tambe continuidad di lesnan.
