Liesje Khemlani a celebra 35 aña di servicio publico

Un trayectoria di dedicacion y compromiso

ORANJESTAD (AAN): Dialuna mainta, Minister di Husticia mr. drs. Arthur Dowers a organisa un momento sorpresa hunto cu coleganan di Bureau di Minister di Husticia, pa celebra 35 aña di servicio publico di Liesje Khemlani.

Durante e momento special aki, Minister Dowers a felicita Liesje cu e logro importante y a expresa su aprecio pa e dedicacion y compromiso cu Liesje a demostra durante su trayectoria den servicio publico. Como reconocemento pa su 35 aña di servicio, Minister Dowers a haci entrega di un plakaat conmemorativo y su envelop di jubileo.

Di su 35 añanan den servicio publico, Liesje a dedica 34 aña na Parlamento di Aruba, caminda durante añanan a brinda su servicio na diferente Miembronan di Parlamento y a tene contacto cu Minister, Gobernador, diferente instancianan di Gobierno, prensa, bufetenan di abogado y ciudadanonan cu tabatin necesidad di informacion of asistencia.

Desde final di november 2025, el a continua su trayectoria profesional na Bureau di Minister di Husticia.

Mirando atras riba su trayectoria, Liesje ta describi e añanan aki como un caminda cu tabatin su desafionan, pero tambe hopi momentonan gratificante. Durante tur e añanan, su fe den Señor y su compromiso pa cumpli cu su trabao y sirbi otro a sigui forma parti importante di su manera di traha.

Su 34 aña na Parlamento di Aruba a brinda un experencia amplio y e oportunidad pa observa di cerca con decisionnan y accionnan den servicio publico por tin un impacto directo riba comunidad.

Cu ainda un parti di su trayectoria pa bay, su compromiso ta pa sigui cumpli cu su trabao y defende balornan di integridad, berdad, compasion y servicio, cu su fe den Señor como guia.

Minister Dowers y coleganan di Bureau di Minister di Husticia ta felicita nan colega cu su 35 aña di servicio publico y ta gradicie pa su dedicacion y compromiso den servicio di Aruba.