ORANJESTAD (AAN): Diamars 6 di october lo publica y presenta e rapport nobo di investigacion
Chinese Presence and Geopolitical Resilience in the Caribbean Parts of the Kingdom of the Netherlands. E investigacion ta analiza presencia Chines na Aruba, Bonaire, Curaçao, Saba, Sint Eustatius y Sint Maarten, y ta uza e analisis aki pa identifica vulnerabilidadnan mas amplio y oportunidadnan pa fortalece resiliencia geopolitico y economico.
Presencia Chines riba e islanan a crece den e ultimo decadanan, principalmente pa medio di migracion, emprendimiento y actividad economico priva. Na mes momento, e investigacion ta haya poco evidencia cu influencia di estado Chines a aumenta sustancialmente. P’esey, un punto importante den henter e rapport ta e diferencia entre presencia y influencia: presencia economico of social no ta significa automaticamente influencia politico of influencia dirigi pa un estado.
E analisis ta mustra tambe cu, como economianan chikito y habri, e islanan ta depende fuertemente di actornan externo den areanan manera importacion, energia, infrastructura digital, logistica, turismo y seguridad. P’esey, e rapport ta wak mas leu cu China so y ta duna punto di salida concreto pa fortalece resiliencia, entre otro door di comprende y diversifica dependencianan mihor, fortalece intercambio di informacion y supervision, y mehora colaboracion den Reino, cu respeto pa e diferente responsabilidadnan y autonomia di e paisnan y entidadnan publico.
E investigacion a wordo haci den cuadro di China Knowledge Network pa investigadornan di Clingendael, den colaboracion cu investigadornan local y investigadornan cu amplio experiencia den Caribe. Pa e investigacion a tene 43 entrevista cu stakeholdernan, entre nan formuladornan di maneho, empresarionan, miembronan di comunidad Chines y representantenan di organisacionnan publico y priva. E perspectivanan local tabata esencial pa situa datonan formal y desaroyonan geopolitico mas amplio den nan contexto specifico di cada isla.
Presentacion
Diamars 6 di october 2026
15:30–17:00 ora di Hulanda / 09:30–11:00 ora di Caribe
Den Haag y online
E rapport lo wordo presenta pa Raoul Bunskoek, Tobias Koster, Simone van der Zee, Renske Pin y Luc Alofs.
Pa registra pa e presentacion: https://lnkd.in/e5gHPP_4 Despues di e presentacion, e rapport completo lo ta disponibel pa download via www.chinakennisnetwerk.nl/library
