Ley di curatela pa adictonan ta anticua y lo wordo adapta

Minister Mervin Wyatt-Ras

ORANJESTAD (AAN): E problema di adiccion, sea di esnan riba caya cu ta mas visibel como esnan den hogarnan, ta uno cu ta sigui crece den nos comunidad. Minister di Salubridad, Asunto Social, Cuido di Adulto Mayor y Maneho di Adiccion, drs. Mervin Wyatt-Ras a expresa cu mester atende cu e problematica aki mas lihe posibel pa asina duna tratamento na e ciudadanonan aki. Minister Wyatt-Ras a remarca cu recientemente, dos persona di su bureau a bay tanto Corsou y Boneiro pa busca luga pa adictonan por bay pa haya tratamento.

   Na Aruba, e minister a menciona, tin e ley di ‘onder curatele stelling’ cu ta indica cu na momento cu tin un luga adecua, por pone un persona bou curatela. E ley aki ta den uzo por ehempel ora ta trata di personanan cu problema psikiatrico ta wordo manda den exterior pa haya tratamento. Den e casonan aki y di adictonan, mester tin un persona di famia pa tuma encargo di e persona. Aki ta unda cu hopi biaha no ta haya un persona dispuesto door di miedo pasobra e adicto por bringa of lanta cu nan pa motibo cu e no ta confia nan mas.

   E minister a menciona cu e ley di curatela aki cu a wordo uza den pasado tambe, tin su beneficionan aunke cu e ley ta wordo considera antiguo. Sinembargo ya caba a discuti pa adapta e ley y ya caba plannan ta canando pa asina yega na cierto adaptacion.